"तांडव वेब सिरीजप्रकरणी माफी मिळणार नाही" - आ.राम कदम.

20-Jan-2021

Total Views | 119

घाटकोपर पोलीस ठाण्यात वेब सिरीजच्या निर्माता- दिग्दर्शकांवर गुन्हा दाखल

मुंबई: हिंदू देवी देवतांवर केलेल्या टिप्पणीमुळे वादात अडकलेल्या 'तांडव' वेब सिरीजप्रकरणी मुंबईतील घाटकोपर पोलीस ठाण्यात प्राथमिक तक्रार दाखल केली आहे. भारतीय दंडसंहितेच्या कलम १५३ (अ), २९५ (अ) आणि ५०५ नुसार निर्माता, दिग्दर्शक आणि इतर कलाकारांच्या विरुद्ध गुन्हा दाखल झाला आहे. यामध्ये सिरीजचा अभिनेता सैफ अली खानचेही नाव आहे.

यावेळी राम कदम यांनी सुद्धा याप्रकरणी सरकारवर टीका केली. "आम्ही तक्रार दाखल करण्याची मागणी करून १०० तास उलटले तरी या तीन पक्षाच्या सरकारने गुन्हा दाखल केला नव्हता. भारतातल्या अन्य ठिकाणी कितीतरी गुन्हे दाखल झाले आहेत, पण या महाराष्ट्राच्या भूमीत मात्र 'तांडव' या वेब सिरीजविरुद्ध गुन्हा दाखल न करता, संबंधितांना पाठीशी घालण्याचं काम झालं आहे," असेही आ. राम कदम यावेळी म्हणाले.

याआधी 'तांडव' वेब सिरीजप्रकरणी आमच्याकडे तक्रार आलेली असून नियमानुसार या संदर्भात कारवाई केली जाईल, असे आश्वासन गृहमंत्री अनिल देशमुख यांनी दिले होते. याबरोबरच ओटीटी प्लॅटफॉर्मवर प्रदर्शित होणाऱ्या वेब सीरिजच्या बाबतीत केंद्र शासनाने कायदे व नियम बनवायला हवेत, असे गृहमंत्री देशमुख यांनी सांगितले आहे.

अॅमेझॉन प्राईमची वेब मालिका तांडवमध्ये हिंदू भावनांना दुखावल्याचा आरोप करत उत्तर प्रदेश पोलिसांमध्ये गुन्हा दाखल करण्यात आलेला आहे. या संदर्भात उत्तर प्रदेश पोलिसांचे एक पथक तपासासाठी मुंबईत बुधवारी सकाळी दाखल झालेले आहे. तांडव वेब मालिकेचा निर्माता दिग्दर्शक व चित्रपटाशी संबंधित काही कलाकारांची चौकशी यूपी पोलिसांच्या पथकाकडून केली जाणार आहे.