मी आता अध्यक्ष नाही...राहुल गांधींकडून राजीनाम्यावर शिक्कामोर्तब

ट्विटरवर 4 पानी भावूक पत्रातून स्पष्टीकरण

राहुल गांधी यांनी दिलेला राजीनामा काँग्रेस कार्यकारिणीने एकमताने नाकारला होता तसेच, त्यानंतर काँग्रेसचे अनेक वरिष्ठ नेते राहुल गांधी यांनी राजीनामा देऊ नये, यासाठी त्यांची मनधरणी करत होते. अखेर, राहुल गांधी यांनीच याबाबत खुलासा करत, मी माझा राजीनामा याआधीच दिलेला असून आता मी काँग्रेसचा अध्यक्ष राहिलो नसल्याचे स्पष्ट केले. तसेच, काँग्रेस कार्यकारिणीने आणखी विलंब न करता तातडीने नव्या अध्यक्षाबाबत निर्णय घ्यावा, त्यासाठी बैठक बोलवावी, असेही राहुल यांनी सांगितले. तसेच, आपल्या अधिकृत ट्विटर खात्यावरून आपल्या राजीनाम्याबाबतचे चार पानी सविस्तर पत्रही त्यांनी शेअर केले.

काँग्रेसचा अध्यक्ष या नात्याने 2019 च्या लोकसभा निवडणुकीतील पक्षाच्या पराभवाची जबाबदारी आपण स्वीकारली असल्याचे ते म्हणाले. माझ्या सहकार्यांनी मला सल्ला देताना मीच काँग्रेसचा नवा अध्यक्ष निवडावा, असे सुचवले होते. परंतु, असे करणे योग्य नसल्याचेही राहुल यांनी स्पष्ट केले.

नव्या अध्यक्षाबाबतच्या चर्चेला उधाण

राहुल गांधींनी राजीनाम्याबाबत शिक्कामोर्तब करताच आता काँग्रेसच्या नव्या अध्यक्षाच्या निवडीबाबत चर्चांना उधाण आले आहे. ज्येष्ठ नेते सुशीलकुमार शिंदे यांचे नाव याकरिता आघाडीवर आहे. तरीई, सलग दोन वेळा लोकसभा निवडणुकीत मोठ्या मताधिक्याने पराभूत झालेल्या 77 वर्षीय शिंदे यांना अध्यक्षपद खरोखरच मिळेल का, अशी शंका उपस्थित केली जात आहे. दुसरीकडे, शिंदे हे गांधी घराण्याशी निष्ठावान असल्यामुळे शिंदे यांच्यासारख्याच एखाद्या नेत्याची अध्यक्षपदी वर्णी लागेल, असाही अंदाज व्यक्त होत आहे.