अधिवेशनाचे कामकाज व्यवस्थित पार पडेल : विनोद तावडे

मुंबई : पावसाळी अधिवेशनाच्या पूर्वसंध्येला संसदीय कार्यमंत्री विनोद तावडे यांनी रविवारी विधानपरिषदेचे विरोधी पक्ष नेते धनंजय मुंडे यांच्या ‘बी-४’ या शासकीय निवासस्थानी त्यांची भेट घेतली. यावेळी विरोधकांशी चर्चा केल्यानंतर पावसाठी अधिवेशनाचे कामकाज व्यवस्थितरीत्या पार पडेल, असा विश्वास प्रसारमाध्यमांशी बोलताना व्यक्त केला.

यावेळी विरोधीपक्ष नेत्यांच्या बैठकीत उपस्थित ज्येष्ठ आ. गणपतराव देशमुख, अजित पवार, पृथ्वीराज चव्हाण,छगन भुजबळ, नसिम खान, बाळासाहेब थोरात, विजय वडेट्टीवार, शेकापचे जयंत पाटील, अबु आझमी,जयंत पाटील आदी नेते उपस्थित होते. तावडे यांनी यावेळी विरोधपक्ष नेत्यांशी सोमवारपासून सुरू होणार्‍या पावसाळी अधिवेशनाच्या कामकाजासंदर्भात सविस्तर चर्चा केली.

या भेटीनंतर प्रसिद्धी माध्यमांशी बोलताना तावडे यांनी सांगितले की, पावसाळी अधिवेशनाच्या कालावधीत विरोधी पक्षांच्या कोणत्या चर्चा व विषयांचा आग्रह आहे, त्यासंदर्भात विरोधी पक्ष नेत्यांशी बैठकीत चर्चा केली. लोकशाहीप्रक्रियेमध्ये सत्ताधार्‍यांसोबत विरोधकांचेही तितकेचे महत्त्व आहे. अधिवेशनाच्या कामकाजात जनतेचे अधिकाधिक प्रश्न मार्गी लावण्याच्या दृष्टीने विधिमंडळाचे कामकाज सुरळीत चालविले गेले पाहिजे, असे आवाहन विरोधी पक्षांच्या नेत्यांना करण्यात आले.

अधिवेशनामध्ये जनतेच्या दृष्टीने चांगल्या विषयांना न्याय देण्याच्या दृष्टीने व त्यांचे प्रश्न मार्गी लावण्यासाठी ते चर्चेने एकत्र सोडविण्याबाबत विरोधकांनी सहमती दर्शविली. विरोधी पक्षांना सोबत घेऊनच विधिमंडळाचे कामकाज यशस्वी होत असते त्यादृष्टीने आपण विरोधी पक्षांच्या नेत्यांना आवाहन केले असून विधिमंडळ अधिवेशनाचे कामकाज नक्कीच व्यवस्थितपणे पार पडेल असा विश्वास तावडे यांनी व्यक्त केला.

माहितीच्या महापुरात रोजच्या रोज नेमका मजकूर मिळविण्यासाठी लाईक करा... facebook.com/MahaMTB/ आणि फॉलो करा twitter.com/MTarunBharat