रिलायन्स कंपनीचा पुन्हा एक नवा विक्रम !

मुंबई : मुकेश अंबानी यांच्या अधिपत्याखालील रिलायन्स इंडस्ट्रीजने गुरुवारी पुन्हा एक नवीन इतिहास रचला. रिलायन्स इंडस्ट्रीज १० लाख कोटी रुपयांच्या बाजार भांडवलाची नोंद करणारी पहिली भारतीय कंपनी ठरली. पेट्रोलपासून ते दूरसंचारपर्यंतचा व्यवसाय करणाऱ्या या कंपनीचे बाजार भांडवल गुरुवारी शेअर बाजार बंद झाल्यानंतर १०,०१, ५५५.४२ कोटी रुपये (१३९.८ अब्ज डॉलर) झाले. गुरुवारी सकाळी १०.२५ वाजता मुंबई शेअर बाजारात कंपनीने १०,००,६०४.५५ कोटी रुपयांच्या बाजार भांडवलांची नोंद केली. विशेष बाब म्हणजे या वर्षी कंपनीच्या शेअरच्या किमतीत जवळपास ४१ टक्के वाढ झाली आहे, तर सेन्सेक्समध्ये याच कालावधीत केवळ १४ टक्के वाढ झाली.

कंपनीच्या शेअरची किंमत गुरुवारी ०.६५ टक्क्यांनी वाढून १,५७९.९५ रुपयांवर बंद झाली. दिवसभराच्या व्यवहारात ती ०.९० टक्क्यांनी वाढून १,५८४ रुपयांवर गेले. कंपनीच्या शेअरची ही आतापर्यंतची सर्वाधिक किंमत आहे. गेल्याच आठवड्यात कंपनीने ९.५ लाख कोटी रुपयांच्या बाजार भांडवलाला स्पर्श केला होता. १८ ऑक्टोबरला ९ लाख कोटी रुपयांच्या बाजार भांडवलाची नोंद केली. कंपनीने अशा प्रकारे केवळ २७ सौद्यांच्या सत्रात आपल्या बाजार भांडवलात एक लाख कोटी रुपयांच्या वाढीची नोंद करत हे यश मिळवले आहे. मुकेश अंबानी यांच्या कंपनीने गेल्या काही दिवसांत टेलिकॉम आणि रिटेलसारख्या ग्राहकांशी निगडित क्षेत्रात गुंतवणूक केली आहे. या गुंतवणुकीच्या बळावर कंपनीने चांगली कामगिरी केली.