भारत देशात २०२० च्या फेब्रुवारी महिन्यापासून कोरोना महामारीने हाहाकार माजवण्यास सुरुवात केली होती; त्यामुळे खबरदारीचा उपाय म्हणून देशभरातील सर्वच आंतरराष्ट्रीय उड्डाणे काही क्षणातच बंद करण्यात आली होती. पुण्यात पण डीजीसीए ने खबरदारीचा उपाय म्हणून पुणे विमानतळावरून दुबई कडे जाणारी विमानसेवा त्वरित बंद केली होती . तब्बल २० महिने उलटून गेल्यानंतरही ही आंतरराष्ट्रीय विमान सेवा सुरु करण्यात आलेली न्हवती. कोरोनाची स्थिती जस जशी नियंत्रणात येत गेली तस तस पुण्यातील देशांतर्गत विमान सेवा सुरु करण्यात आली होती; मात्र दुबई ला जाणारी सेवा स्थगितच ठेवण्यात आली होती.
मात्र आता नागरी उड्डाण महासंचलनालयाने (डीजीसीए) पुणे शहरातील कोरोनाची स्थिती पाहता पुणे आंतरराष्ट्रीय विमानतळावरून दुबईला जाणारी विमान सेवा पुन्हा सुरु करण्यास परवानगी दिली आहे. स्पाईसजेट या विमानसेवा देणाऱ्या कंपनी कडून लवकरच पुणे-दुबई आंतरराष्ट्रीय विमान सुरु होणार आहे. दुबईला जाणारे हे विमान पुण्याहून रोज सकाळी ७ वाजून ५ मिनिटांनी उड्डाण घेईल. लवकरच स्पाईसजेट या कंपनी कडून या विमान सेवेच्या तिकिटाचे दर आणि तिकीट बुक करायची वेळा जाहीर करण्यात येणार आहेत. तसेच इतर विमान सेवा देणाऱ्या कंपन्यांकडून सुद्धा पुण्याहून दुबई साठी विमान उड्डाणासाठी डीजीसीए कडे परवानगी मागण्यात आली असून डीजीसीए ने परवानगी दिल्यास इतर कंपन्या पण पुणे- दुबई ची विमान सेवा लवकरच सुरु करणार आहेत.