डोंबिवली एमआयडीसी स्फोट प्रकरण ; मुख्य आरोपीला अटक!

डोंबिवली येथील एमआयडीसी स्फोटातील मुख्य आरोपीला नाशिक येथील मेहेरधाम परिसरातून अटक करण्यात नाशिक आणि ठाणे पोलिसांना यश आले आहे. मालती प्रदीप मेहता असे अटक केलेल्या आरोपीचे नाव असून, आरोपीवर सदोष मनुष्यवधाचा गुन्हा दाखल करण्यात आल्याची माहिती नाशिक पोलिसांनी दिली आहे.

स्फोट झाल्यानंतर आरोपी पोलिसांना गुंगारा देत फरार झाली होती. ठाणे गुन्हे अन्वेषण विभागाचे पोलीस उपायुक्त शिवराज पाटील यांनी नाशिक गुन्हे अन्वेषण विभागाचे पोलीस उपायुक्त प्रशांत बच्छाव यांच्याशी संपर्क साधत आरोपी नाशिकमध्ये असल्याची माहिती दिली. लाईव्ह लोकेशन आणि तांत्रिक विश्लेषणाच्या आधारे आरोपी मालती मेहता नाशिकमध्ये असल्याची माहिती ठाणे पोलिसांना समजली.

त्यानंतर नाशिकचे पोलीस आयुक्त संदीप कर्णिक यांच्या आदेशाने नाशिक गुन्हे अन्वेषण युनिट-1 चे वरिष्ठ पोलीस निरीक्षक मधुकर कड आणि ठाणे गुन्हे अन्वेषण युनिट-4 या टीमने नाशिकच्या पंचवटी परिसरातून नातेवाईकांकडे आश्रय घेतलेल्या या आरोपीला अटक केली. दरम्यान, डोंबिवली येथे गुरूवार, दि. 23 मे रोजी रासायनिक कारखान्यात झालेल्या स्फोटात 11 जणांचा मृत्यु झाला, तर 60 जण जखमी झाले आहेत. या प्रकरणी कारखाना संचालक मालती प्रदीप मेहता हिचा पोलीस शोध घेत होते. पोलीस आयुक्त संदीप कर्णिक, उपायुक्त प्रशांत बच्छाव यांच्या मार्गदर्शनाखाली ही शोध मोहीम राबविण्यात आली.