आयसीसीच्या अध्यक्षपदाची सूत्र जय शाह यांच्या हाती

नवी दिल्ली : ‘भारतीय क्रिकेट नियामक मंडळा’चे (बीसीसीआय) सचिव जय शाह यांनी ‘आंतरराष्ट्रीय क्रिकेट परिषदे’चे (आयसीसी) अध्यक्षपद स्वीकारले आहे. ग्रेग बार्कले यांची जागा घेणारे ३५ वर्षीय जय शाह हे आयसीसीचे सर्वात तरुण अध्यक्ष ( ICC Precident ) बनले आहेत. भाजप नेते तथा केंद्रीय गृहमंत्री अमित शाह यांचे ते पुत्र आहेत. २०२० साली पहिल्यांदा या पदावर नियुक्त झाल्यानंतर बार्कले यांनी तिसरी टर्म न घेण्याचा निर्णय घेतला. त्यांच्यानंतर या पदासाठी जय शहा यांची निवड झाली.

जय शाह आता शरद पवार, एन. श्रीनिवासन, शशांक मनोहर आणि जगमोहन दालमिया यांसारख्या भारतीय प्रशासकांच्या यादीत सामील झाले आहेत. जय शाह यांनी २००९ साली क्रिकेट प्रशासनातील आपला प्रवास सुरू केला होता. ‘सेंट्रल क्रिकेट बोर्ड अहमदाबादच्या कार्यकारी मंडळा’चे सदस्य म्हणून त्यांनी प्रवास सुरू केला होता. सप्टेंबर २०१३ साली शाह यांनी ‘गुजरात क्रिकेट असोसिएशन’(जीसीए)चे संयुक्त सचिव झाल्यानंतर अहमदाबादमधील प्रतिष्ठित नरेंद्र मोदी स्टेडियमच्या बांधकामात मदत केली. २०१५ साली ते बीसीसीआयमध्ये वित्त आणि विपणन समितीचे सदस्य म्हणून सामील झाले.

आयसीसीने अध्यक्षपदाची जबाबदारी स्वीकारल्यानंतर जय शाह म्हणाले की, “जागतिक स्थरावर ओळख निर्माण करण्याची क्रिकेटमध्ये अफाट क्षमता आहे. मी आयसीसी टीमस् आणि त्याच्या सदस्य संघांसोबत जवळून काम करण्यासाठी, या संधीचा फायदा घेत या खेळाला आणखी नव्या उंचीवर नेण्यासाठी उत्सुक आहे. मी ग्रेग बार्कले यांचे त्यांच्या नेतृत्वाबद्दल आणि गेल्या चार वर्षांत जे यश मिळवले, त्यासाठी आभार मानतो. मी आता क्रिकेटला आणखी यश मिळवून देण्यासाठी आयसीसी टीमसोबत काम करण्यास उत्सुक आहे.