भारताची छाप ठळक करणारा पंतप्रधानांचा परदेश दौरा

नवी दिल्ली, पंतप्रधान नरेंद्र मोदी पाच देशांच्या दौऱ्यानंतर गुरुवारी मायदेशी परतले आहेत. पंतप्रधानांनी आपल्या आठ दिवसांच्या दौऱ्यात घाना, त्रिनिदाद आणि टोबॅगो, अर्जेंटिना, ब्राझील आणि नामिबिया या पाच देशांना भेट दिली. त्यांनी ब्राझीलमधील रिओ दि जानेरो येथे झालेल्या १७ व्या ब्रिक्स शिखर परिषदेलाही उपस्थिती लावली.

पंतप्रधान नरेंद्र मोदी पहिल्यांदा २ जुलै रोजी घानाला पोहोचले. येथे पंतप्रधान मोदींना घानाचा सर्वोच्च नागरी सन्मान 'द ऑफिसर ऑफ द ऑर्डर ऑफ द स्टार ऑफ घाना' प्रदान करण्यात आला. त्यानंतर पंतप्रधान मोदींनी घानाच्या संसदेला संबोधित केले. विशेष म्हणजे तीन दशकांनंतर एका भारतीय पंतप्रधानाने घानाला भेट दिली.

घानाच्या यशस्वी दौऱ्यानंतर पंतप्रधान नरेंद्र मोदी कॅरिबियन देश त्रिनिदाद आणि टोबॅगो येथे पोहोचले. देशाची राजधानी पोर्ट ऑफ स्पेन येथे पोहोचल्यानंतर विमानतळावर पंतप्रधान मोदींचे जोरदार स्वागत करण्यात आले. त्रिनिदाद आणि टोबॅगोच्या अध्यक्षा क्रिस्टीन कांगालू यांनी पंतप्रधान नरेंद्र मोदी यांना त्रिनिदाद आणि टोबॅगोचा सर्वोच्च राष्ट्रीय पुरस्कार 'द ऑर्डर ऑफ द रिपब्लिक ऑफ त्रिनिदाद आणि टोबॅगो' प्रदान केला.

त्यांनी येथे संसदेला संबोधित केले. भारत आणि त्रिनिदाद आणि टोबॅगो यांच्यात सहा महत्त्वाचे करार झाले आहेत. पंतप्रधान मोदी आणि त्रिनिदाद आणि टोबॅगोचे पंतप्रधान कमला प्रसाद बिसेसर यांच्यातील बैठकीनंतर, दोन्ही देशांनी पायाभूत सुविधा विकास, औषधनिर्माण आणि संरक्षण यासारख्या क्षेत्रात सहकार्य वाढविण्यावर सहमती दर्शविली.

पंतप्रधान नरेंद्र मोदी दौऱ्याच्या तिसऱ्या टप्प्यात दक्षिण अमेरिकन देश अर्जेंटिना येथे पोहोचले. अर्जेंटिनाचे अध्यक्ष जेवियर मायले यांनी राजधानी ब्यूनस आयर्समध्ये पंतप्रधान नरेंद्र मोदींचे स्वागत केले. दोन्ही नेत्यांनी द्विपक्षीय बैठकीद्वारे चर्चा केली. यावेळी पंतप्रधानांनी भारत-अर्जेंटिना राजनैतिक संबंधांची ७५ वर्षे पूर्ण होण्याविषयी समाधान व्यक्त केले.

दौऱ्याच्या चौथ्या टप्प्यात, पंतप्रधान मोदी ब्राझीलला पोहोचले. रिओ डी जानेरो येथे त्यांनी १७ व्या ब्रिक्स शिखर परिषदेत भाग घेतला. ब्रिक्स शिखर परिषदेत पंतप्रधानांनी दहशतवाद आज मानवतेसाठी सर्वात गंभीर आव्हान बनल्याचे अधोरेखित केले. त्याचप्रमाणे २० व्या शतकात स्थापन झालेल्या जागतिक संस्था २१ व्या शतकातील आव्हानांना तोंड देण्यास असमर्थ आहेत. जगाच्या विविध भागात सुरू असलेले संघर्ष असोत, साथीचे रोग असोत, आर्थिक संकट असोत किंवा सायबरस्पेसमध्ये नवीन उदयास येणारी आव्हाने असोत, या संस्थांकडे कोणताही उपाय नाही. परिणामी जागतिक पुनर्बांधणी आवश्यक असल्यावर त्यांनी भर दिला.

ब्रिक्स शिखर परिषदेत सहभागी झाल्यानंतर, पंतप्रधान मोदी ब्राझीलला भेट देण्यासाठी ब्राझीलियाला रवाना झाले. ब्राझीलचे अध्यक्ष लुला दा सिल्वा यांनी पंतप्रधान नरेंद्र मोदी यांना देशाचा सर्वोच्च नागरी सन्मान 'ग्रँड कॉलर ऑफ द नॅशनल ऑर्डर ऑफ द सदर्न क्रॉस' देऊन सन्मानित केले. पंतप्रधान नरेंद्र मोदी आणि ब्राझीलचे अध्यक्ष लुला दा सिल्वा यांच्या उपस्थितीत भारत आणि ब्राझीलमध्ये अनेक महत्त्वाचे सामंजस्य करार करण्यात आले. दोन्ही देशांमधील व्यापार, विज्ञान, तंत्रज्ञान आणि सांस्कृतिक सहकार्य मजबूत करण्याच्या दिशेने हे करार एक मोठे पाऊल मानले जातात.

पंतप्रधान नरेंद्र मोदी त्यांच्या परदेश दौऱ्याच्या पाचव्या आणि शेवटच्या टप्प्यात नामिबियाला पोहोचले. पंतप्रधान नरेंद्र मोदी आणि नामिबियाचे राष्ट्राध्यक्ष डॉ. नेतुम्बो नंदी-नदैतवाह यांनी नामिबियातील विंडहोक येथे प्रतिनिधीमंडळ स्तरावरील चर्चा केली. पंतप्रधान मोदींना बुधवारी नामिबियाचा सर्वोच्च नागरी सन्मान 'ऑर्डर ऑफ द मोस्ट एन्शियंट वेल्वित्शिया मिराबिलिस' प्रदान करण्यात आला. पंतप्रधान मोदींनी नामिबियाच्या संसदेला संबोधित केले.