ज्ञानवापी पुरातत्व सर्वेक्षणास सर्वोच्च न्यायालयाची तात्पुरती स्थगिती

 

 

नवी दिल्ली : ज्ञानवापीमध्ये एएसआयकडून करण्यात येत असलेल्या सर्वेक्षणाला सर्वोच्च न्यायालयाने स्थगिती दिली आहे. सर्वोच्च न्यायालयाने सोमवारी (२४ जुलै २०२३) आदेश दिला की, वाराणसीच्या जिल्हा न्यायालयाने २१ जुलै रोजी दिलेल्या आदेशाला २६ जुलै सायंकाळी ५ वाजेपर्यंत स्थगिती दिली जात आहे. तोपर्यंत 'मशिद समिती' या निर्णयाला आव्हान देण्यासाठी अलाहाबाद उच्च न्यायालयात जाईल, असे सर्वोच्च न्यायालयाने म्हटले आहे.

 

सोबतच जिल्हा न्यायालयाने अपील करण्यासाठी वेळ द्यायला हवा होता, असेही सर्वोच्च न्यायालयाने म्हटले आहे. सुप्रीम कोर्टाने सांगितले की, शुक्रवारी संध्याकाळी हा आदेश सुनावण्यात आला, त्यामुळे 'मशिद कमिटी'ला त्याविरोधात अपील करण्यास वेळ मिळाला नाही. सर्वोच्च न्यायालयाने मशिद कमिटी'ला उद्याच उच्च न्यायालयात जाण्याचे आदेश दिले. यासोबतच सुप्रीम कोर्टाने अलाहाबाद हायकोर्टाला २६ जुलै रोजी संध्याकाळी ५ वाजेपूर्वी सुनावणी करण्यास सांगितले आहे.