मुंबई : माजी मुख्यमंत्री उद्धव ठाकरे आणि आदित्य ठाकरेंसह ठाकरे गटाचे खासदार संजय राऊत यांच्यावर किरीट सोमय्या यांनी गंभीर आरोप केले आहेत. एका चहावाल्याच्या कंपनीला १०० कोटी रुपयांचा ठेका दिला, असा आरोप किरीट सोमय्या यांनी केला. तसेच बापाने ज्या कंपनीवर बंदी घातली त्या कंपनीला मुलाने ठेका दिला, असाही आरोप सोमय्या यांनी पत्रकार परिषदेत केला आहे.
१०० कोटी रुपयांचा कोविड घोटाळा बाहेर आला. मुंबई पोलिसांनी या प्रकरणी दोघांना अटक केली. कोट्यवधी रुपयांचे गैरव्यवहार सापडले. काही आयकर विभाग, काही ईडीने, तर काही काही मुंबई पोलिसांनी शोधले. संजय राऊत यांचे भागिदार सुजित पाटकर यांच्या ‘लाईफ लाईन हॉस्पिटल मॅनेजमेंट सर्व्हिस’ या कंपनीला महापालिकेकडून एकूण ३२ कोटी रुपये मिळाले. त्यापैकी १४ कोटी ३ लाख २९ हजार ८३९ रुपये एका वेगळ्याच बँक खात्यात पाठवण्यात आले, असल्याचा आरोप सोमय्या यांनी या वेळी केला.
एका मेव्हुण्याच्या खात्यात लाखो रुपये पाठवले गेले
या संपूर्ण घोटाळ्यात बँक खात्यातून कोणाकोणाला पैसे गेले याचा तपास सुरू आहे. आयकर विभाग यावर तपास करत आहे. तसेच ईडी आणि मुंबई पोलीसही यावर तपास करत आहेत. एका मेव्हुण्याच्या खात्यात लाखो रुपये पाठवले गेले. हा मेव्हुणा काही दिवसांनी कळेल. या प्रकरणी ज्यांना अटक झाली त्यात केईम रुग्णालयाबाहेरचा चहावाला असल्याचे सोमय्यांनी माध्यमांना सांगितले.
आदित्य ठाकरेंनी तर पुण्यात पीएमआरडीएने बंदी घातलेल्या कंपनीला वरळीतील आयसीयू ठेका दिला. पीएमआरडीएचे अध्यक्ष तत्कालीन मुख्यमंत्री उद्धव ठाकरे होते. त्यानंतर अवघ्या आठ दिवसात तीन कोविड रुग्णांचे मृत्यू झाले. त्यामुळे या कंपनीवर बंदी घालण्यात आली, असे सोमय्या म्हणाले.