पंतप्रधान नरेंद्र मोदींनी केली 'ही' मोठी घोषणा

 

 

 

 

 

नवी दिल्ली : पंतप्रधान नरेंद्र मोदी यांनी सोमवारी करोना संसर्गामुळे माता-पित्यांचे छत्र गमाविलेल्या मुला-मुलींना ‘पीएम केअर फॉर चिल्ड्रेन’ योजनेअंतर्गत व्हिडीओ कॉन्फरन्सिंगद्वारे आर्थिक मदत जारी केली. यावेळी केंद्रीय मंत्री आणि राज्यांचे मुख्यमंत्री या कार्यक्रमात सहभागी झाले होते.

 

 

 

पंतप्रधानांनी कोरोनामुळे आपल्या प्रियजनांना गमावलेल्या मुलांना आयुष्यात भेडसावत असलेल्या अडचणींबद्दल सहानुभूती व्यक्त केली. आई आणि वडील दोघांचेही छत्र गमावलेल्या अशा मुलांच्या अडचणी कमी करण्यासाठी पीएम केअर्स फॉर चिल्ड्रन हा एक छोटा प्रयत्न असल्याचे पंतप्रधान नरेंद्र मोदी म्हणाले. देशातील प्रत्येक नागरिक तुमच्या पाठिशी असल्याची ग्वाही पंतप्रधानांनी यावेळी त्यांना दिली. कोणा व्यावसायिक अभ्यासक्रमासाठी किंवा उच्च शिक्षणासाठी शैक्षणिक कर्ज हवे असेल तर त्यासाठी देखील पीएम-केअर्स मदत करेल अशी माहिती पंतप्रधानांनी दिली.

 

 

 

इतर दैनंदिन गरजांसाठी अन्य योजनांद्वारे दरमहा ४ हजार रुपयांची व्यवस्थाही करण्यात आली आहे. वयाच्या २३ व्या वर्षी १० लाख रुपयांव्यतिरिक्त आयुष्मान कार्डद्वारे आरोग्य सुरक्षा आणि मानसिक आणि भावनिक मदतीसाठी संवाद हेल्पलाइनद्वारे भावनिक समुपदेशन सुविधा उपलब्ध करून देण्यात आली आहे, असेही पंतप्रधान मोदी यावेळी म्हणाले. केंद्र सरकारने आठ वर्षांचा कार्यकाळ पूर्ण केला असून देशवासियांना सरकारवर विश्वास असून त्यांचा स्वत:वरील विश्वासही वाढला असल्याचे पंतप्रधानांनी सांगितले.

 

 

 

ते पुढे म्हणाले, भ्रष्टाचार, हजारो कोटींचे घोटाळे, घराणेशाही, देशभर पसरत असलेल्या दहशतवादी संघटना आणि प्रादेशिक भेदभाव या दुष्टचक्रात देश २०१४ पूर्वी अडकला होता. मात्र, २०१४ सालानंतर आता देश त्यातून बाहेर पडत आहे. स्वच्छ भारत मिशन, जन धन योजना किंवा हर घर जल अभियान यांसारख्या कल्याणकारी योजनांद्वारे ‘सबका साथ सबका विकास, सबका विश्वास आणि सबका प्रयास’ या भावनेने केंद्र सरकार वाटचाल करत आहे. मागील ८ वर्षे गोरगरिबांच्या कल्याणासाठी आणि सेवेसाठी समर्पित होती, असेही पंतप्रधानांनी यावेळी नमूद केले.