ज्येष्ठ साहित्यिक मनोहर म्हैसाळकर यांचे निधन

14-Oct-2022

Total Views | 62

नागपूर : विदर्भ साहित्य संघाचे अध्यक्ष आणि ज्येष्ठ साहित्यिक मनोहर म्हैसाळकर यांचे शुक्रवार, दि. १४ ऑक्टोबर रोजी नागपूर येथे निधन झाले. मृत्यूसमयी ते ९० वर्षांचे होते. उत्तम संघटक, व्यवस्थापक, खेळाडू, साहित्याचे जाणकार आणि अष्टपैलू व्यक्तिमत्वाचे धनी म्हणून म्हैसाळकर सुपरिचित होते. त्यांच्या पश्चात दोन विवाहित मुली आणि मोठा परिवार आहे.

साहित्य जगताची मोठी हानी

मनोहरराव म्हैसाळकर यांच्या निधनाचे वृत्त अतिशय दु:खद आहे. त्यांच्या निधनाने केवळ एक उत्तम साहित्यिकच नाही, तर एक चांगला संघटक, व्यवस्थापक, खेळाडू आपल्यातून हिरावला गेला आहे. अनेक दिग्गज साहित्यिक आणि लेखकांना एका सूत्रात बांधण्याचे काम मनोहररावांनी केले होते. या जाणकार साहित्यिकाचे निधन ही साहित्यजगताची मोठी हानी आहे. मी त्यांना भावपूर्ण श्रद्धांजली अर्पण करतो.

- देवेंद्र फडणवीस, उपमुख्यमंत्री, महाराष्ट्र

साहित्य चळवळ पोहोचवण्यात योगदान

विदर्भ साहित्य संघाचे अध्यक्ष मनोहर म्हैसाळकर यांच्या निधनाचे वृत्त ऐकून अतिशय दुःख झाले. मनोहरजी उत्तम संघटक आणि प्रशासक होते. साहित्य चळवळ विदर्भाच्या कानाकोपऱ्यात पोहचविण्यात त्यांचे मोलाचे योगदान होते. विदर्भातील नाट्य चळवळीशी देखील त्यांचा जवळचा संबंध होता. त्यांच्या निधनाने साहित्य क्षेत्राची मोठी हानी झाली आहे. ईश्वर दिवंगत आत्म्यास शांती देवो आणि त्यांच्या परिवारास हे दुःख सहन करण्याची शक्ती देवो.'

- नितीन गडकरी, केंद्रीय मंत्री, भारत सरकार