रोहित की राहुल? कोण असेल पुढचा कर्णधार?

मुंबई : भारतीय संघाची आयसीसी टी २० विश्वचषक स्पर्धेतील कामगिरी ही नावाला साजेशी झालेली नाही. अशामध्ये स्पर्धेपूर्वीच सध्याचा कर्णधार विराट कोहली हा टी २०मधील आपले कर्णधारपद सोडणार असल्याचे घोषित केले आहे. तरीही, जर भारतीय संघ हा उपांत्य फेरी गाठू शकला नाही, तर विराटला एकदिवसीय संघाचेही नेतृत्व करण्याची संधी मिळणार नाही असे चित्र सध्या समोर येत आहे. त्यामुळे आता पुढचा कर्णधार कोण होणार? रोहित शर्मा की के. एल. राहुल? नवे प्रशिक्षक राहुल द्रविडची पसंती कोणाला असणार? अशा अनेक गोष्टीवर सध्या क्रिकेट वर्तुळात चर्चा रंगली आहे.

 

 

 

एका मुलाखती दरम्यान राहुल द्रविडला 'पुढचा कर्णधार कोण?' असे विचारले असता त्याने रोहित शर्माचे नाव घेतले. त्यानंतर त्याने के.एल.राहुलचेही नाव घेतले. यावरून आता पुढच्या कर्णधारपदासाठी अनेक तर्कवितर्क लावले जात आहे. ३ प्रकारच्या फॉरमॅटमध्ये ३ वेगवेगळे कर्णधार असतील, अशीदेखील चर्चा रंगली आहे. अनेक क्रिकेट संघ हा फॉरमॅट वापरत आहेत.

 

 

 

रोहितच्या नेतृत्वात मुंबई इंडियन्स संघाने पाचवेळा आयपीएलचे विजेतेपद जिंकले आहे. तसेच त्याने १० एकदिवसीय आणि १९ टी २० सामन्यांत भारताचे नेतृत्त्व केले आहे. यावेळी त्याने एकदिवसीयमध्ये ८ तर टी २०मध्ये १५ सामने कर्णधार म्हणून जिंकून दिले आहेत. त्यामुळे त्याला या पदाचा मजबूत दावेदार मानले जाते. तर, के. एल. राहुलने पंजाबचे कर्णधारपद सांभाळताना अनेक विजय मिळवून दिले आहेत. तसेच, रिषभ पंत आणि श्रेयस अय्यर यांचेदेखील या शर्यतीत नावे येतात. मात्र, रोहितचे नाव सर्वाधिक पुढे आहे.