'तनिष्क' समर्थनात फेक 'ट्विटस्' : कारवाईच्या ईशाऱ्यानंतर 'डिलीट'

मुंबई (महाMTB विशेष) : 'तनिष्क'या टाटा उद्योगसमूहाच्या दागिनेविक्री व्यवसायाची 'लव्ह जिहाद'ला प्रोत्साहन देणारी जाहिरात वादाचा विषय ठरते आहे. देशभरातील हिंदूंनी बहिष्कार टाकण्याचा इशारा दिल्यावर तनिष्कने ही जाहिरात मागे घेतली. परंतु त्यानंतर हिंदुत्वाचा द्वेष करणाऱ्यांनी हिंदुत्ववादयांना खिजवण्यासाठी 'ट्विटर'-'फेसबुक'वर फेक बातम्या प्रसारित करण्याची सुरवात केली होती. मात्र, वस्तुस्थिती समोर आणून कायदेशीर कारवाईचा इशारा दिल्यानंतर आता हिंदुत्वविरोधक स्वतःच्या पोस्ट-ट्विट डिलीट करू लागले आहेत.

 

 

राहुल गांधींचे निकटवर्तीय समजले जाणारे साकेत गोखले, 'द इंडेपेडन्ट'च्या कथित पत्रकार स्तुती मिश्रा यांनी असा प्रकार केल्याचे उघड झाले आहे. पत्रकार असल्याचे सांगणाऱ्या स्तुती मिश्रा नावाच्या ट्विटर हँडल वरून दोन बनावट ट्विट करण्यात आले होते. शेफाली वैद्य यांनी 'तनिष्क'च्या जाहिरातीचा निषेध नोंदवला आणि त्याविरोधात बहिष्कार मोहिमही चालविली.

 

 

'शेफाली यांनीच तनिष्कमधून दागिने विकत घेतल्याचा ट्विटरवर फोटो शेअर केला आहे', अशा आशयाच्या शेफाली यांच्या ट्विटचा एक बनावट फोटो स्तुती मिश्रा यांनी प्रसारित केला होता. साकेत गोखले यांनीही हा प्रकार केल्याचे म्हटले जात आहे. "हा फोटो खोटा असून डिलीट करा अन्यथा कायदेशीर कारवाईला सामोरे जायला तयार रहा", असा कडक इशारा शेफाली वैद्य यांनी दिला. त्याबरोबर तथाकथित लिबरलांनी संबंधित ट्विट डिलीट केले. स्तुती मिश्रा या कथित पत्रकाराने तर थेट अकाउंटच डिलीट केले असल्याचे समजते.