कोल्हापूर, दि.२१ :वृत्तसंस्था कोल्हापूर जिल्ह्यातील चंदगड तालुक्यातील परिते-गारगोटी-गडहिंग्लज-नागणवाडी-चंदगड- हेरे मोटनवाडी फाटा- कळसगादे कोदाळी- भेडशी ते राज्य हद्दीमधील तिलारी घाट अवजड वाहतुकीसाठी दिनांक ३१ ऑक्टोबर अखेर बंद करण्याचे आदेश देण्यात आले आहेत. वाहतूक सुरक्षा उपाययोजनेनुसार वाहतुक नियंत्रित करण्याचे आदेशही देण्यात आले आहेत. चंदगड तालुक्यात तसेच तिलारी घाटामध्ये पावसाळ्यामध्ये अतिवृष्टी होत असल्याने घाटामध्ये अपघात होण्याची शक्यता असल्याने वाहतूक नियंत्रित करण्याचा निर्णय घेण्यात आल्याची माहिती मिळते आहे.
घाट अवजड वाहतुकीस अत्यंत धोकादायक
चंदगड पोलीस ठाणे हद्दीतून बेळगांव, शिनोळी, पाटणे फाटा, हलकर्णी, नागनवाडी, चंदगड, हेरे, मोटणवाडी, तिलारीनगर या मार्गावरुन येणाऱ्या अवजड वाहनांची वाहतूक तिलारी घाटातून मोठ्या प्रमाणात होते. तर बेळगांव, कर्नाटक येथुन गुगल मॅपवर गोव्यास जाणारा जवळचा रस्ता तिलारी घाटातुन दाखवतो. त्यामुळे वाहन चालक या घाटातून प्रवास करतात. गुगल मॅपवरुन परराज्यातून येणाऱ्या अवजड वाहनांवरील चालक हे या घाटाचा अंदाज नसतानाही अवजड वाहन तिलारी घाटातून घेवून जाण्याचे धाडस करतात त्यामुळे अपघाताच्या घटना व वाहने घाटामध्ये अडकुन राहण्याच्या घटना घडतात.
अवजड वाहतुकीसाठी दोन पर्यायी मार्ग उपलब्ध
तिलारी घाटातुन होत असलेल्या अवजड वाहनांच्या वाहतुकीसाठी पर्यायी मार्ग आंबोली घाट तसेच कर्नाटक राज्यातील चोर्ला घाट असे दोन पर्यायी मार्ग आहेत. संकेश्वर-गडहिंग्लज-आजरा- आंबोली ते बांदा या महामार्गाचे काम प्रगतीपथावर असून ३० जून २०२४ अखेर महामार्गाचे काम पूर्ण होणार आहे. तसेच उत्तुर-आजरा-आंबोली मार्गे सावंतवाडी ते गोवा अशी वाहतुक देखील या मार्गावरुन होऊ शकते. या पर्यायी महामार्गावरुन अवजड वाहतूक वळविण्यास हकरत नसल्याचे आदेशात म्हटले आहे.