पाकपुरस्कृत दहशतवाद - द. आशियातील प्रादेशिक शांततेला धोका ; काठमांडू येथील चर्चासत्रात मोठा खुलासा

मुंबई : नेपाळ इन्स्टिट्यूट फॉर इंटरनॅशनल कोऑपरेशन अँड एंगेजमेंटच्या (एनआयआयसीई) वतीने काठमांडू, नेपाळ येथे 'दक्षिण आशियातील दहशतवाद : प्रादेशिक शांतता आणि सुरक्षेला आव्हाने' या विषयावर एक उच्चस्तरीय चर्चासत्र आयोजित करण्यात आले होते. पाकिस्तानस्थित दहशतवाद दक्षिण आशियातील प्रादेशिक शांततेला कशाप्रकारे धोका निर्माण करतो, हे या चर्चासत्रातून उघड झाले.

नेपाळच्या राष्ट्रपतींचे सल्लागार आणि माजी उद्योग मंत्री सुनील बहादूर थापा यांनी सांगितले की, लष्कर-ए-तैयबा आणि जैश-ए-मोहम्मद सारख्या गटांचे अल-कायदाशी ऐतिहासिक संबंध आहेत आणि ते पाकिस्तानमध्ये कार्यरत आहेत. ज्यामुळे भारताला धोका निर्माण झाला असून ते नेपाळचा ट्रान्झिट पॉइंट म्हणून वापर करू शकतात.

नेपाळचे माजी संरक्षण मंत्री डॉ. मीनेंद्र रिजाल पुढे म्हणाले की, भारतावरील दहशतवादी हल्ल्याचा नेपाळवर परिणाम होऊ शकतो. पाकिस्तानने दहशतवादाला प्रोत्साहन दिल्याने प्रादेशिक आर्थिक एकात्मतेलाही अडथळा निर्माण झाला आहे. याने पाकिस्तानचे मोठे आर्थिक नुकसान झाले आहे. त्यांनी ११ सप्टेंबर रोजी अमेरिकेत झालेल्या हल्ल्यानंतर दिसलेल्या एकतेप्रमाणेच जागतिक एकतेचे आवाहन केले, जेणेकरून दहशतवादाचा प्रभावीपणे सामना करता येईल.

संसद सदस्य आणि माजी महिला, बालके आणि ज्येष्ठ नागरिक मंत्री चंदा चौधरी यांनी सीमापार दहशतवाद रोखण्यासाठी मनी लाँडरिंगला आळा घालण्याचे महत्त्व अधोरेखित केले. माजी मंत्री शिशिर खनाल यांनी भारताच्या तात्काळ आणि सशक्त प्रतिसादाचे कौतुक केले, ज्यामध्ये 'ऑपरेशन सिंदूर' द्वारे लष्करी कारवाई आणि पाकिस्तानची राजनैतिक हकालपट्टी यांचा समावेश आहे, यामुळे प्रादेशिक दहशतवादविरोधी लढाईत एक नवीन उंबरठा स्थापित झाला आहे.

नेपाळ लष्कराच्या माजी मेजर जनरल डॉ. पूर्णा सिलवाल यांनी भर दिला की जर दहशतवादाचा समूळ नाश करायचा असेल तर देशांनी दहशतवादविरोधी प्रयत्नांमध्ये दुहेरी निकष टाळले पाहिजेत. नेपाळचे माजी परराष्ट्र सचिव राजदूत मधु रमण आचार्य यांनी भारत आणि नेपाळ दरम्यान गुप्तचर माहितीची देवाणघेवाण आणि संयुक्त सीमा गस्त घालण्याच्या गरजेवर भर दिला. त्यांनी पुढे म्हटले की दहशतवादाविरुद्धच्या लढाईत आम्ही भारतासोबत आहोत.

'एनआयआयसीई'च्या संचालक सुमित्रा कार्की यांनी नेपाळच्या दहशतवादाच्या असुरक्षिततेवर प्रकाश टाकण्यासाठी हरकत-उल-मुजाहिदीनने इंडियन एअरलाइन्सच्या विमानाचे काठमांडूहून केलेले अपहरण आणि पाकिस्तानस्थित लष्कर-ए-तैयबाने एप्रिलमध्ये केलेल्या पहलगाममधील दहशतवादी हल्ल्याचा उल्लेख केला, ज्यामध्ये एका नेपाळी नागरिकासह २६ नागरिकांचा मृत्यू झाला होता.

एनआयआयसीईचे संशोधन संचालक डॉ. प्रमोद जयस्वाल यांनी सांगितले की पाकिस्तान दक्षिण आशियातील दहशतवादाचे केंद्र आहे, ज्याचा दहशतवाद्यांना पोषण आणि आश्रय देण्याचा इतिहास आहे. त्यांनी पाकिस्तानचे संरक्षण मंत्री ख्वाजा मुहम्मद आसिफ यांच्या अलीकडील कबुलीचाही उल्लेख केला, ज्यांनी जाहीरपणे कबूल केले की पाकिस्तानने अमेरिका, ब्रिटन आणि पाश्चात्य हितसंबंधांसाठी जवळजवळ तीन दशकांपासून दहशतवाद्यांना पाठिंबा, निधी आणि प्रशिक्षण दिले आहे. या चर्चासत्रात ज्येष्ठ राजकीय नेते, माजी मंत्री, सुरक्षा तज्ञ, शिक्षणतज्ज्ञ यांसह १५० हून अधिक विद्वान सहभागी झाले होते.