रवींद्र वायकर यांचा मुख्यमंत्र्यांच्या उपस्थितीत शिवसेनेत प्रवेश

रवींद्र वायकर यांचा बाळासाहेबांच्या खऱ्या शिवसेनेत प्रवेश झाला आहे, अशी भावना पक्षप्रवेशानंतर मुख्यमंत्री शिंदे यांनी व्यक्त केली. ते म्हणाले, देशामध्ये पंतप्रधान मोदींच्या नेतृत्वात विकासाचे पर्व सुरू असून जगात देशाची मान उंचावली आहे. याच विकासाच्या दृष्टिकोनातूनच रवींद्र वायकर यांनी आपल्या सरकारवर विश्वास ठेवला आहे. मतदारसंघातील प्रलंबित कामे पूर्ण करण्यासाठी वायकरांनी पक्षात प्रवेश केला आहे, असे मुख्यमंत्री शिंदे यावेळी म्हणाले.

वायकरांच्या पक्षप्रवेशाच्या निमित्ताने समज-गैरसमज दूर झाले असून मतदारांचे प्रश्न सोडविणे महत्त्वाचे आहे, असेही शिंदे यावेळी म्हणाले. तसेच, सर्वसामान्यांना न्याय देण्यासाठी आपलं सरकार काम करत असल्याचेही मुख्यमंत्री शिंदेंनी सांगितले. शिंदे गट शिवसेनेत पक्षप्रवेश केल्यानंतर रवींद्र वायकर यांनी आपण पक्षात ५० वर्षे झाली आहेत काम करतो आहे. तसेच, आपल्या मतदारसंघातील कामे पूर्ण करण्याकरिता शिवसेनेत पक्षात सहभागी झालो आहे, असे पक्ष प्रवेशानंतर रवींद्र वायकर म्हणाले. आरे सर्वोदय नगर आदी माझ्या मतदारसंघातील प्रलंबित प्रश्न सोडविण्यासाठी मी हा पक्षप्रवेश करत आहे.