जयंतराव सहस्त्रबुद्धे ; डॉ. हेडगेवारांच्या आदर्श स्वयंसेवकांच्या माळेतील एक सुंदर मोती

मुंबई : जयंतराव सहस्त्रबुद्धे म्हणजे राष्ट्रीय स्वयंसेवक संघाचे आद्य सरसंघचालक प. पू. डॉ. केशव बळीराम हेडगेवार यांना अपेक्षित अशा आदर्श कार्यकर्त्यांच्या माळेतील एक सुंदर मोती. देशासाठी तसेच समाजासाठी स्वतःला समर्पित करणारे उत्तम स्वयंसेवक घडावे हे डॉ. हेडगेवारांचे स्वप्नं होते. जयंतराव हे त्या स्वयंसेवकांपैकीच एक!, असे प्रतिपादन राष्ट्रीय स्वयंसेवक संघाचे अखिल भारतीय सहसरकार्यवाह डॉ. कृष्ण गोपाळ यांनी जयंतरावांना श्रद्धांजली वाहताना केले. ’विज्ञान भारती’चे राष्ट्रीय संघटन सचिव आणि राष्ट्रीय स्वयंसेवक संघाचे ज्येष्ठ प्रचारक जयंतराव श्रीकांत सहस्रबुद्धे यांनी दि. २ जून रोजी वयाच्या ५७ व्या वर्षी अखेरचा श्वास घेतला. त्यांना आदरांजली म्हणून सोमवारी राजा शिवाजी विद्यालय, दादर (पू) येथे ’श्रद्धांजली सभा’ आयोजित करण्यात आली होती. त्यावेळी कृष्णजी गोपाळ बोलत होते.