‘महाशिवरात्री’साठी पुन्हा ‘देऊळबंद’!

डोंबिवली : डोंबिवलीतील शिवमंदिरात दरवर्षी मोठ्या उत्साहात महाशिवरात्री उत्सव साजरा केला जातो. पण, यंदा कोरोनाच्या पार्श्वभूमीवर सर्व मंदिरे भक्तांना दर्शनासाठी बंद ठेवण्यात आली आहे.

‘श्री पिंपळेश्वर महादेव मंदिर ट्रस्ट’तर्फे ‘श्री पिंपळेश्वर महादेव भक्त मंडळा’ने महाशिवरात्री उत्सव सार्वजनिक स्वरूपात होणार नसल्याचे जाहीर केले आहे. ‘श्री पिंपळेश्वर महादेव भक्त मंडळा’ने ‘कोविड-१९’ विषाणूचा प्रादुर्भाव रोखण्यासाठी व महाराष्ट्र शासनाच्या सार्वजनिक उत्सवाबाबतच्या नियमांचे पालन करण्यासाठी गुरुवार, दि. ११ मार्च आणि शुक्रवार, दि. १२ मार्च रोजी महाशिवरात्री उत्सव सार्वजनिक स्वरूपात होणार नाही, असे भक्तांना कळविले आहे. महाशिवरात्रीच्या ११ व १२ मार्च रोजी श्री पिंपळेश्वर मंदिरात भाविकांना दर्शनाचा लाभ घेता येणार नाही. त्या काळात दर्शनासाठी येऊ नये. भक्तांसाठी दोन दिवस दर्शनसेवा बंद आहे. तरी महादेव भक्तांनी या दोन दिवसांत सहकार्य करावे, असे आवाहन केले आहे.

श्री पिंपळेश्वर महादेव मंदिराचे नित्य नियमाचे विधी, पूजा पुरोहित ठरावीक भक्तगणांच्या उपस्थितीत पार पाडणार आहेत. इतर भक्तांना यामध्ये सहभागी करून घेतले जाणार नाही. ‘श्री गणेश मंदिर संस्थान’तर्फे गणपती मंदिरातही महाशिवरात्री उत्सव साजरा केला जातो. पण, यंदा या उत्सवासाठी भक्तांना मंदिरात ‘नो एंट्री’ आहे. मंदिरातील पुजारी दरवर्षीप्रमाणे सर्व पूजा विधिवत करणार आहेत. खिडकाळेश्वर महादेव मंदिर महाशिवरात्रीसाठी सजविण्यात आले आहे. पण, महाशिवरात्री उत्सवासाठी ग्रामस्थ आणि भक्तांना हे मंदिर बंद राहणार आहे. मंदिरे बंद असल्याने भाविकांमध्ये मोठ्या प्रमाणात नाराजीचे वातावरण आहे.