घातपाताची शक्यता म्हणून जबाबदारी कशी टाळाल ? राम कदमांचा सवाल

14-Oct-2020

Total Views | 110

मुंबई : मुंबईचा वीज पुरवठा खंडित होण्यामागे घातपाताची शक्यता खुद्द उर्जामंत्री नितीन राऊत यांनी व्यक्त केल्यानंतर मोठी खळबळ माजली आहे. मुंबईतील वीज पुरवठा खंडित होण्यामागे घातपाताची शक्यता नाकारता येत नाही, असे ट्विट नितीन राऊत यांनी केले. राऊतांच्या या ट्विटला आता भाजपनेही जोरदार प्रत्युत्तर दिले आहे. घातपाताची शक्यता म्हणून राज्य सरकारला जबाबदारी कशी टाळता येईल? असा सवाल भाजपचे आमदार राम कदम यांनी विचारला.

घातपाताची शक्यता ? असं म्हणून महाराष्ट्र सरकारला स्वतःची जबाबदारी कशी टाळता येईल ?कोट्यावधि लोकांची गैरसोय झाली त्रास झाला संपत्ती पासून सर्वच गोष्टीचे नुकसान झालं याला जबाबदार तुमच्या सरकारचा नाकर्तेपणा आहे त्यामुळे उगाच अशी विधाने करून लोकांची दिशाभूल तुम्हाला करता येणार नाही https://t.co/cBX5an15Bu
— Ram Kadam (@ramkadam) October 14, 2020

भाजप आमदार राम कदम यांनी ऊर्जामंत्र्यांना प्रश्न विचारताना सरकार आपली जबाबदारी कशी झटकू शकतं? असा सवाल केलाय. त्याचबरोबर ‘कोट्यवधी लोकांची गैरसोय झाली, त्यांना त्रास झाला, संपत्तीपासून सर्वच गोष्टींचे नुकसान झालं. याला जबाबदार तुमच्या सरकारचा नाकर्तेपणा आहे, त्यामुळं उगाच अशी वक्तव्य करुन तुम्हाला लोकांची दिशाभूल करता येणार नाही,’ असे प्रत्युत्तर कदम यांनी दिले.

स्वतःची जबाबदारी झटकत असताना #काँग्रेस नेते अपयशाचे सर्व खापर राष्ट्रवादीचे गृहमंत्री @AnilDeshmukhNCP यांच्या माथ्यावर टाकत आहेत हे राष्ट्रवादीला मंजूर आहे का ?मुंबईत वीज जाण्यामागे घातपात असू शकतो ?
म्हणजे गृहमंत्री अनिल देशमुख यांचं अपयश ? https://t.co/cBX5an15Bu
— Ram Kadam (@ramkadam) October 14, 2020

दरम्यान, सोमवारी मुंबईसह ठाणे आणि नवी मुंबईच्या काही भागातील वीज पुरवठा तब्बल तीन तास खंडित झाला होता. त्यामुळं जनजीवन विस्कळीत झालं होतं. लोकल वाहतूक, कार्यालयीन कामकाज, रुग्णालयातील यंत्रणा, कोविड सेंटर आणि दैनंदिन कामांवर त्याचा मोठा परिणाम झाला होता. देशाची आर्थिक राजधानी असणाऱ्या मुंबईत जवळपास तीन तास वीज नव्हती. त्यामुळे विरोधकांनी सरकारला चांगलेच धारेवर धरले होते.