अखेर ‘धर्मवीर २’ची तारीख जाहिर, या तारखेला उलगडणार साहेबांच्या हिंदुत्वाची गोष्ट....

 

 

 

 

मुंबई : धर्मवीर आनंद दिघे यांच्या जीवनावर आधारित ‘धर्मवीर...मुक्काम पोस्ट ठाणे’ हा चित्रपट २०२२ रोजी प्रदर्शित झाला होता. आता दोन वर्षांनी या चित्रपटाचा पुढचा भाग ‘धर्मवीर २... साहेबांच्या हिंदुत्वाची गोष्ट’ हा चित्रपट भेटीला येणार आहे. ३० जून २०२४ रोजी मुख्यमंत्री एकनाथ शिंदे यांच्या हस्ते या चित्रपटाचे मोशन पोस्टर आणि प्रदर्शनाची तारीख रिलीज करण्यात आली. धर्मवीर २ हा चित्रपट येत्या ऑगस्ट महिन्यात बॉक्स ऑफिसवर जोरदार धमाका होणार आहे.

 

ज्येष्ठ अभिनेते अशोक सराफ, महेश कोठारे आणि सचिन पिळगांवकर, बॉबी देओल यांच्या उपस्थितीत आणि मुख्यमंत्र्यांच्या हस्ते ‘धर्मवीर – २’ हा चित्रपट ९ ऑगस्ट रोजी, क्रांती दिनाचे औचित्य साधून प्रदर्शित होणार असल्याचे जाहिक करण्यात आले. विशेष म्हणजे, एकाच दिवशी मराठी आणि हिंदी या दोन भाषांमध्ये संपूर्ण जगभरात हा चित्रपट प्रदर्शित केला जाणार आहे.

 

‘धर्मवीर – २’ या चित्रपटाची निर्मिती झी स्टुडिओज आणि साहील मोशन आर्ट्स या निर्मिती संस्थेचे मंगेश देसाई,उमेश कुमार बन्सल यांनी केली आहे. कथा,पटकथा, संवाद आणि दिग्दर्शन अशी चौफेर भूमिका प्रवीण विठ्ठल तरडे यांनीच निभावली असून महेश लिमये यांनी कॅमेरामन म्हणून काम पाहिले आहे. नोव्हेंबर महिन्यात या चित्रपटाचे चित्रीकरण सुरू करण्यात आले होते. 'धर्मवीर... मुक्काम पोस्ट ठाणे' या चित्रपटातून स्वर्गीय आनंद दिघे यांचा जीवनप्रवास मांडण्यात आला होता. अभिनेता प्रसाद ओक याने साकारलेली दिघे साहेबांची भूमिका लाजवाब होती. या चित्रपटाला अनेक पुरस्कारांनी देखील गौरवण्यात आले होते.

 

‘धर्मवीर – २’ चित्रपटाच्या पोस्टरवर करारी नजर असलेले दिघे साहेब झोपाळ्यावर बसलेले दिसतात."हिंदुत्त्वाशी गद्दारी करणाऱ्यांना क्षमा नाही" अशी ओळही नमूद करण्यात आली आहे. त्यामुळे आता कमालीची उत्सुकता या पोस्टरमुळे निर्माण झाली आहे. मराठीसह हा चित्रपट हिंदीतही प्रदर्शित केला जाणार असल्याने "धर्मवीर - २" आता जगभरात पोहोचणार आहे. "धर्मवीर" या चित्रपटाला बॉक्स ऑफिसवर मिळालेला तुफान प्रतिसाद पाहता "धर्मवीर - २" पुन्हा एकदा बॉक्स ऑफिसवर धमाका करेल यात काहीच शंका नाही. त्यामुळे आता प्रतीक्षा ९ ऑगस्टची...