कर्मचाऱ्यांना पगार नाही : एसटीचे राज्याकडे २६८.९६ कोटी थकीत

मुंबई : लॉकडाऊन काळातील आणि इतर असे मिळून एसटी महामंडळाचे राज्य सरकारकडे २६८.९६ कोटी थकीत आहेत, अशी माहिती उघड झाली आहे. हा निधी देऊन राज्य सरकारने एसटी महामंडळाच्या कर्मचाऱ्यांच्या वेतनाची व्यवस्था करावी, अशी मागणी महाराष्ट्र एसटी वर्कर्स काँग्रेस (इंटक) संघटनेचे अध्यक्ष माजी आमदार जयप्रकाश छाजेड व सरचिटणीस मुकेश तिगोटे यांनी केली आहे.

कोरोनाच्या पार्श्वभूमीवर महाराष्ट्र शासनाने परराज्यातील मजुरांना परराज्याच्या सीमेवर पोहचवण्यासाठी एस.टी. महामंडळाच्या बसने मोफत प्रवास करण्याची मुभा दिलेली होती. तसेच प्रवासाचा खर्च शासन देणार असल्याचे जाहीर केले होते. परंतु मजुरांनाच्या मोफत प्रवासाचे पैसे मदत व पुर्नवसन खात्याकडून ९४ कोटी ९६ लाख इतकी रक्कम एस.टी. महामंडळास येणी आहे.

तसेच पोलीस वॉरंट, कारागृह वॉरंट, निवडणूक याकरीता एस.टी. बसच्या खर्चापोटी शासनाकडून १४७ कोटी रुपयांची येणी आहे. याशिवाय विविध प्रवास सवलत मुल्यांच्या प्रतिपुर्तीपोटी २७ कोटी रूपये येणे आहे. महाराष्ट्र शासनाकडून सर्व येणी मिळून २६८.९६ कोटी रूपये बाकी आहेत.

एसटी महामंडळाने कर्मचाऱ्यांना मे महिन्याचे वेतन ५० टक्के देऊन १०० टक्के कपाती केल्याने निव्वळ वेतन अत्यंत कमी आलेले आहे. एसटी कर्मचाऱ्यांच्या मुलभूत गरजा भागविणे शक्य नसल्याने कर्मचाऱ्यांच्या कुटुंबीयांवर उपासमारीची वेळ आली आहे. तसेच जुन महिन्याचे वेतन अद्यापपर्यंत देण्यात आलेले नाही. त्यामुळे एसटी कर्मचाऱ्यांना अनेक संकटांना सामोरे जावे लागत आहे.

गुजरात, कर्नाटक, आंधप्रदेश, तेलंगणा यासह विविध राज्यातील एसटी महामंडळास संबंधित राज्यशासनाने एसटी कर्मचा-यांच्या वेतनासाठी अर्थसहाय्य दिलेले आहे. त्याचप्रमाणे महाराष्ट्र शासनाने वेतनासाठी ५०० कोटी रुपये अर्थसहाय्य द्यावे. तसेच मजुर प्रवास, पोलीस वॉरंट, कारागृह वॉरंट, निवडणूक, विविध प्रवास सवलत मुल्यांच्या प्रतिपुर्तीपोटी परतावा असे एकूण २६८.९६ कोटी तात्काळ एस.टी. महामंडळास द्यावे.

राज्य सरकारकडून एसटी महामंडळास २६८.९६ कोटी रुपयांची येणीसह ५०० कोटी रूपये अर्थसहाय्य तात्काळ देऊन एसटी कर्मचाऱ्यांचे मे महिन्याचे ५० टक्के व जून महिन्याचे संपूर्ण वेतन देण्याची मागणी महाराष्ट्र एसटी वर्कर्स काँग्रेस (इंटक) संघटनेने केली आहे.