पुलवामा हल्ल्याप्रकरणी जैश-ए-मोहम्मदच्या आणखी एका दहशतवाद्याला अटक

29-Feb-2020

Total Views | 136

पुलवामा हल्ल्यातील 'सुसाइड बॉम्बर' आदिल अहमद दार याला आपल्या घरात दिला होता आश्रय

नवी दिल्ली : पुलवामा हल्ल्यात सक्रिय सहभाग असलेल्या जैश-ए-मोहम्मद या पाकिस्तानातील दहशतवादी संघटनेच्या एका दहशतवाद्याला एनआयएने अटक केली आहे. शकीर बशीर मगरे असे अटक करण्यात आलेल्या दहशतवाद्याचे नाव आहे. पुलवामा हल्ल्याचा तपास करत असलेल्या एनआयए हे मोठे यश मिळाले आहे. शाकिरला न्यायालयात हजर करण्यात आले. त्याला न्यायालयाने १५ दिवसांची कोठडी ठोठावली आहे.

शाकिर हा पुलवामातील काकापोरा येथील हाजीबालचा राहाणारा आहे. फर्निचर शॉपचा मालक असलेल्या शाकिरने पुलवामा हल्ल्यातील 'सुसाइड बॉम्बर' आदिल अहमद दार याला आपल्या घरात आश्रय दिला होता. तसेच आयईडी बनवण्यातही मदत केली होती, अशी माहिती तपासात समोर आली आहे.

पुलवामा हल्ला हा फेब्रुवारी २०१९ मध्ये घडवून आणण्यात आला होता. सीआरपीएफच्या ताफ्यावर दहशतवादी हल्ला करण्यात आला होता. या स्फोटात ४० जवान शहीद झाले होते. या हल्ल्याचा तपास एनआयए संस्था करत आहे.

एनआयएने याबाबत माहिती सांगितले की, शकीरचा पुलवामा हल्ल्यात स्पष्ट सहभाग होता. हा आत्मघाती हल्ला करणारा दहशतवादी आदिल अहमद दारला सर्वप्रकारची मदत शकीरने केल्याचे पुढे आले आहे. एनआयए तपासात आदिल आणि पाकिस्तानी दहशतवादी मोहम्मद उमर फारूख या दोघांना पुलवामा हल्ल्याच्या आधी २०१८ पासून आपल्या घरात आश्रय दिल्याची कबुली शकीरने दिली आहे.