जलबचतीचा संदेश देणार्‍या दिंडीने जलसप्ताहास प्रारंभ

 

 

जैन इरिगेशन सिस्टीम्स्, भवरलाल ऍण्ड कांताबाई जैन फाउंडेशन, गांधी रिसर्च फाउंडेशन व तापी विकास महामंडळ यांच्या संयुक्त विद्यमाने जागतिक जलदिनानिमित्त आयोजित जलसप्ताहाची सुरुवात जलदिंडीने झाली.

 

 

महात्मा गांधी उद्यानापासून जलदिंडीला जिल्हाधिकारी किशोर राजे निंबाळकर यांच्याहस्ते हिरवा झेंडा दाखवून सुरुवात झाली. याप्रसंगी जलप्रतिज्ञा व कलशपूजन झाले. उपमहापौर गणेश सोनवणे, संघपती दलिचंद जैन, तापी महामंडळाचे कार्यकारी अभियंता तुषार चिनावलकर व जैन इरिगेशनचे सर्व वरिष्ठ अधिकारी व सहकारी उपस्थित होते. जलदिंडींचा समारोप भाऊंचे उद्यान येथे झाला.

 

 

दिंडीत जल बचतीचा संदेश देणारी आरास होती. ए. टी. झांबरे विद्यालयाचे लेझीम पथक होते. अनुभूती इंग्लिश मीडीयम स्कूलच्या विद्यार्थ्यांनी पावली नृत्य केले. सेंट जोसेफ स्कूलचे स्केटिंग पथक जलदिंडीमध्ये आकर्षण ठरले. शिरसोली येथील संत रूपलाल महाराज भजनी मंडळानेही लक्ष वेधून घेतले. अनुभूती इंटरनॅशनल स्कूल, रूस्तमजी स्कूल, पर्यावरण शाळा, जैन स्पोर्टस् अकादमी, सकल जैन श्री संघ, जैन नवयुवक मंडळ, युवाशक्ती फाऊंडेशन, नीर फाउंडेशन, परिवर्तन, रोटरी जळगाव ईस्ट, लायन्स क्लबने सहभाग घेतला.

 

 

भाऊंच्या उद्यानात २३ रोजी, संध्याकाळी ६ वाजता पाणी परिसंवाद होणार आहे. परिसंवादावेळी औरंगाबाद विभागाचे माहिती आयुक्त व्ही.डी. पाटील हे प्रमुख पाहुणे असतील. परिसंवादामध्ये लोकसहभागातून जल समृद्धी यावर तापी महामंडळाचे पी. पी. वराळे, डॉ. धनंजय नेवाडकर, डॉ. हेमंत पाटील, वर्धमान भंडारी सहभागी होतील. सुप्रसिद्ध शिल्पकार निरंजन शेलार हे पाण्याबाबत शिल्प साकारणार आहेत.