नराधमाचा अंत! अल्पवयीन मुलीवर अत्याचार करून हत्या; ग्रेटर नोएडात आरोपी पोलिस एन्काउंटरमध्ये ठार

ग्रेटर नोएडा (Greater Noida minor girl case) : उत्तर प्रदेशातील ग्रेटर नोएडामध्ये सहा वर्षीय अल्पवयीन मुलीच्या बलात्कार आणि हत्येच्या धक्कादायक घटनेने खळबळ उडाली आहे. मुलगी बेपत्ता असल्याची तक्रार दाखल होताच पोलिसांनी अवघ्या काही तासांत मोठी शोधमोहीम राबवली. CCTV फुटेज आणि स्थानिक नागरिकांच्या मदतीने मुलीचा मृतदेह जवळच्या परिसरातून रात्रीच ताब्यात घेण्यात आला. तपासादरम्यान बलात्कार आणि हत्या झाल्याचे समोर आल्यानंतर पोलिसांनी आरोपी बलराज याला अटक केली. मात्र, गुन्ह्यातील महत्त्वाचे पुरावे जप्त करण्यासाठी नेले असता आरोपीने पोलिसांवर गोळीबार केला. पोलिसांच्या प्रत्युत्तरातील गोळीबारात जखमी झालेल्या बलराजचा उपचारादरम्यान मृत्यू झाला.

 

पोलिस ठाण्यात  तक्रार दाखल

 

डीसीपी सेंट्रल नोएडा शैलेंद्र कुमार सिंह यांनी दिलेल्या माहितीनुसार,दि. २८ ऑगस्टच्या रात्री मुलीच्या पालकांनी इकोटेक पोलिस ठाण्यात धाव घेत मुलगी बेपत्ता असल्याची लेखी तक्रार दाखल केली. तक्रार मिळताच पोलिसांनी संबंधित कलमांनुसार गुन्हा दाखल केला.

 

मुलीचा सुरक्षित शोध घेण्यासाठी पोलिसांनी तातडीने पाच पथके तयार केली. पोलिसांनी मॅन्युअल इंटेलिजन्सच्या माध्यमातून माहिती गोळा करण्यास सुरुवात केली. त्याचबरोबर परिसरातील CCTV फुटेजची तपासणी करण्यात आली. (Greater Noida minor girl case)