नेत्यांकडून सोशल मीडियावर पोलिसांच्या बदनामीचा प्रयत्न; रोहित पवार, वर्षा गायकवाड यांच्या आरोपांना मुंबई पोलिसांचे प्रत्युत्तर!

 

मुंबई (Mumbai Police Viral Protest Video) : दादर शिवाजीपार्क येथे झालेल्या कॉक्रोच जनता पार्टीच्या आंदोलनादरम्यान एका महिला आंदोलकाला पोलिस अधिकाऱ्याने कथितरीत्या गैरवर्तन केल्याचा व्हिडिओ सोशल मीडियावर व्हायरल झाल्यानंतर काँग्रेसच्या आमदार वर्षा गायकवाड आणि राष्ट्रवादी काँग्रेस शरद पवार गटचे आमदार रोहित पवार यांनी मुंबई पोलिसांवर तीव्र टीका केली. मात्र, या आरोपांना मुंबई पोलिसांनी तत्काळ उत्तर देत व्हिडिओचा चुकीचा अर्थ लावला जात असल्याचा दावा केला आहे.

 

आमदार वर्षा गायकवाड यांनी 'एक्स'वरील पोस्टमध्ये, "मुंबई पोलिसांचे हे वर्तन काय आहे? एका पुरुष पोलिसाने तरुण महिला आंदोलकाशी अशी झटापट का केली? महिला पोलिसांकडे हे काम का सोपवले नाही? या अधिकाऱ्यावर काय कारवाई होणार?" असा सवाल उपस्थित करत मुख्यमंत्री देवेंद्र फडणवीस यांना टॅग करण्यात आले होते. (Mumbai Police Viral Protest Video)

 

यावर मुंबई पोलिसांनी अधिकृत 'एक्स' हँडलवरून प्रत्युत्तर देताना म्हटले की, "या घटनेचा बेजबाबदारपणे विपर्यास केला जात आहे. संबंधित अधिकारी कायदा व सुव्यवस्था राखताना एका पुरुष आंदोलकाला पकडण्याचा प्रयत्न करत होते. त्यावेळी संबंधित महिला आंदोलक नकळत त्यांच्या आणि त्या पुरुष आंदोलकाच्या मध्ये आली. अधिकारी दुसऱ्या दिशेला पाहत असल्याने हा प्रसंग घडला. वरिष्ठ अधिकाऱ्यांनी संपूर्ण व्हिडिओ आणि सर्व बाबींची पडताळणी केली असून वस्तुस्थिती स्पष्ट झाली आहे. सार्वजनिक जीवनातील व्यक्तींनी अशा प्रकारचे आरोप करण्यापूर्वी तथ्यांची खात्री करणे अपेक्षित आहे." (Mumbai Police Viral Protest Video)