कोल्हापुरात टिपली वाघांची १३ छायाचित्र; अखिल भारतीय व्याघ्र गणनेत झाली इतक्या वाघांची नोंद

कोल्हापूर वन विभागाने अखिल भारतीय व्याघ्र गणेनेअंतर्गत जिल्ह्यात नुकतीच व्याघ्र गणना पूर्ण केली. अखिल भारतीय वाघ गणना हा जगातील सर्वात मोठा वन्यजीव सर्वेक्षण कार्यक्रम मानला जातो. भारतातील वाघांची संख्या, त्यांचे वितरण, अधिवासाची स्थिती आणि संवर्धनाची परिणामकारकता जाणून घेण्यासाठी दर चार वर्षांनी ही गणना केली जाते. यामध्ये कॅमेरा ट्रॅपिंग, चिन्ह सर्वेक्षण, अधिवास मूल्यांकन आणि सांख्यिकीय विश्लेषण या प्रकियेद्वारे ही गणना पार पडते. या सर्वेक्षणामध्ये वन विभागाने एकूण २३ वन्यजीव प्रजातींची नोंद केल्याची माहिती कोल्हापूरचे (प्रादेशिक) उपवनसंरक्षक धैर्यशील पाटील यांनी दै. 'मुंबई तरुण भारत'शी बोलताना दिली. यामध्ये वाघांची एकूण १३ छायाचित्र टिपल्याचे त्यांनी सांगितले. ही छायाचित्र प्रामुख्याने चंदगडमधील पाटणे आणि आजरा तालुक्यात टिपल्याचे त्यांनी नमूद केले. जरी १३ छायाचित्र टिपली गेली असली तरी पट्टेरी रचनेवरुन ही छायाचित्रे तीन ते चार वाघांची असल्याची शक्यता त्यांनी नमूद केली.