पुणे मेट्रोच्या लोकार्पण सोहळ्यात पंतप्रधान मोदींचा दुष्काळग्रस्तांना धीर!

 

 

 

पुणे (Pune Metro Inauguration): पुण्यातील हिंजवडी-शिवाजीनगर मेट्रो मार्गिकेच्या लोकार्पण सोहळ्यात पंतप्रधान नरेंद्र मोदी यांनी महाराष्ट्रातील दुष्काळग्रस्त शेतकऱ्यांना मराठीतून धीर दिला. मेट्रोच्या विकासाच्या कार्यक्रमातूनच त्यांनी दिवाळीच्या पार्श्वभूमीवर दुष्काळग्रस्त शेतकरी कुटुंबांना मदत करण्याचेही देशवासीयांना आवाहन केले. 

 

पंतप्रधान नरेंद्र मोदी यांनी मंगळवार, दि. ३ नोव्हेंबर रोजी व्हिडिओ कॉन्फरन्सिंगद्वारे सुमारे २१,८०० कोटी रुपयांच्या पुणे मेट्रो प्रकल्पांचे लोकार्पण व भूमिपूजन केले. यात हिंजवडी आयटी हबला शिवाजीनगरशी जोडणाऱ्या २३ किलोमीटर लांबीच्या पिंक लाइनचा समावेश आहे; तर मेट्रोच्या दुसऱ्या टप्प्याची भूमिपूजनही यावेळी झाले.  (Pune Metro Inauguration)

 

 

राज्यातील दुष्काळी परिस्थितीचा उल्लेख करताना पंतप्रधान मोदी म्हणाले, “महाराष्ट्रातील दुष्काळाची मला माहिती आहे. राज्य सरकारने आगाऊ मदतसुद्धा दिली आहे. मी पीएम किसानचा निधी जमा केला आहे. अजिबात काळजी करू नका. आम्ही सारे शेतकऱ्यांसोबत आहोत.” 

 

यावेळी त्यांनी सणासुदीच्या काळात दुष्काळग्रस्त शेतकरी कुटुंबांना विसरू नये, “आपल्या शेतकरी बांधवांच्या घरात दिवाळी साजरी होण्यासाठी मदत करा. आपण सर्वांनी मिळून या संकटाचा सामना करायचा आहे,” असे आवाहन त्यांनी केले.  (Pune Metro Inauguration)

 

 

मेट्रो लोकार्पणाच्या प्रसंगी पंतप्रधानांनी पुणे मेट्रोला “विकासाचे उत्तम मॉडेल” म्हटले. हिंजवडी ते शिवाजीनगर मार्गामुळे पुण्यातील मोठ्या आयटी केंद्राला उत्तम कनेक्टिव्हिटी मिळणार असून, नवीन मेट्रो विस्तारामुळे शहराच्या जुन्या व नव्या भागांमधील संपर्कही बळकट होणार आहे.

 

या प्रकल्पामुळे प्रवास सुलभ होण्यासोबतच वाहतूक कोंडी व खाजगी वाहनांवरील अवलंबित्व कमी होण्याची अपेक्षा आहे. पिंक लाइन पूर्णपणे महिला ट्रेन ऑपरेटर्सद्वारे संचालित होणार असून, तिच्या सुमारे ३० टक्के वीजेची गरज सौरऊर्जेतून भागविली जाणार आहे.

 

 

कार्यक्रमास उपस्थित मुख्यमंत्री देवेंद्र फडणवीस यांनी पुणे मेट्रोला केवळ वाहतुकीचा प्रकल्प नसून आर्थिक विकासाला चालना देणारा प्रकल्प म्हटले. हिंजवडीतील हजारो कर्मचाऱ्यांचा दैनंदिन प्रवास सुलभ होणार असून, मेट्रो, इलेक्ट्रिक बसेस, रिंग रोड, भूमिगत रस्ते व नवीन विमानतळ यांच्या माध्यमातून शहराचे कनेक्टिव्हिटी नेटवर्क सक्षम होत आहे.

 

“पंतप्रधानांच्या मार्गदर्शनाखाली पुणे आणि पिंपरी-चिंचवड महानगर प्रदेश २०३० पर्यंत देशातील महत्त्वाचे मोबिलिटी केंद्र बनेल,” असा विश्वास त्यांनी व्यक्त केला.  (Pune Metro Inauguration)

 

 

देशातील मेट्रोचा विस्तार गेल्या १२ वर्षांत जवळपास १,२०० किलोमीटरपर्यंत वाढला असून २६ शहरांमध्ये मेट्रो सेवा कार्यरत असल्याचे पंतप्रधानांनी सांगितले. महाराष्ट्रात २०१४ मध्ये केवळ १० ते ११ किलोमीटर मेट्रो मार्ग कार्यरत होते; आता हा आकडा जवळपास १७५ किलोमीटरपर्यंत पोहोचला असल्याचेही त्यांनी नमूद केले.

 

याशिवाय देशात गेल्या १०-१२ वर्षांत ५० कोटी लोकांनी गरिबीवर मात केल्याचा दावाही पंतप्रधानांनी यावेळी केला.  (Pune Metro Inauguration)