अजितदादांचे विकासाचे स्वप्न पूर्ण करणे हीच खरी श्रद्धांजली – उपमुख्यमंत्री एकनाथ शिंदे

    16-Nov-2026
 
 Ajit Pawar Development Tribute
 
पुणे (Ajit Pawar Development Tribute) : पुणे जिल्हा परिषदेच्या आवारात स्वर्गीय अजित पवार यांच्या अर्धाकृती पुतळ्याचे अनावरण केंद्रीय गृहमंत्री अमित शहा यांच्या हस्ते करण्यात आले. यावेळी उपमुख्यमंत्री एकनाथ शिंदे यांनी अजित पवार यांच्या आठवणींना उजाळा देत त्यांना श्रद्धांजली अर्पण केली.
 
अजितदादांचे कार्य एका पुतळ्याच्या चौकटीत मावणारे नाही. पुणे आणि बारामतीच्या विकासासाठी त्यांनी घेतलेले कष्ट, त्यांची दूरदृष्टी, प्रशासनावरील विलक्षण पकड आणि सर्वसामान्यांप्रती असलेली आत्मीयता महाराष्ट्र कधीही विसरणार नाही. त्यांनी पाहिलेली विकासाची स्वप्ने आणि हाती घेतलेले प्रकल्प पूर्ण करणे हीच त्यांना खरी श्रद्धांजली ठरेल, असे भावपूर्ण प्रतिपादन शिंदे यांनी केले. (Ajit Pawar Development Tribute)
 
अजितदादांच्या पुतळ्याचे अनावरण करण्याची वेळ आपल्यावर येईल, यावर आजही विश्वास बसत नसल्याची भावना व्यक्त करत शिंदे म्हणाले, २८ जानेवारी हा महाराष्ट्रासाठी काळा दिवस ठरला. माझ्यापेक्षा वयाने आणि अनुभवाने मोठा असलेला भाऊ गमावल्याचे दुःख मनात आहे. त्यांच्या जाण्याने महाराष्ट्राचे मोठे नुकसान झाले आहे.
 
विकासकामांची पाहणी करताना एखाद्या वास्तूतील वायर बाहेर आली आहे का, रंगकाम अपूर्ण आहे का, याकडेही अजितदादा बारकाईने लक्ष द्यायचे. प्रकल्पांचा लाभ शेवटच्या घटकापर्यंत पोहोचला पाहिजे, हा त्यांचा आग्रह असायचा. प्रशासनावरील त्यांची पकड आणि विषयांचा सखोल अभ्यास विलक्षण होता. वरिष्ठ सनदी अधिकारीही त्यांच्या प्रश्नांसमोर निरुत्तर होत असत. कठोर निर्णय घेणे आणि त्यांची प्रभावी अंमलबजावणी करणे ही त्यांची खासियत होती. विरोधी पक्षनेते असतानाही त्यांनी केवळ विरोधासाठी विरोध न करता विधायक सूचना केल्या. अधिवेशनात शेवटपर्यंत बसून काम करण्याची त्यांची वृत्ती अनुकरणीय होती. (Ajit Pawar Development Tribute)
 
योजनेच्या लाभार्थ्यांची कौटुंबिक परिस्थिती जाणून घेणारे आणि त्यांच्या अडचणी समजून घेणारे अजितदादा संवेदनशील नेतृत्व होते. स्पष्टवक्तेपणा आणि परखडपणासोबतच त्यांच्यात विलक्षण प्रेमळपणाही होता. त्यामुळेच लोक त्यांना गर्दीतून 'दादा' म्हणून हाक मारत असत. (Ajit Pawar Development Tribute)
 
मेट्रो आणि रिंगरोडसारख्या प्रकल्पांद्वारे पुण्यातील वाहतूक कोंडीवर उपाय शोधणे, तसेच बारामतीचा नियोजनबद्ध विकास करणे, असे त्यांचे व्हिजन होते. अर्थमंत्री म्हणून आर्थिक शिस्त पाळताना 'आपले पांघरूण पाहून हातपाय पसरावेत' हा त्यांचा स्पष्ट संदेश असायचा. ऊस उत्पादक, कांदा उत्पादक आणि सहकार क्षेत्रातील अडचणी सोडवण्यासाठी त्यांनी सातत्याने पुढाकार घेतला. प्राप्तिकराच्या प्रश्नातून साखर कारखान्यांना दिलासा मिळवून देण्यासाठीही त्यांनी प्रयत्न केले.
 
मुख्यमंत्री देवेंद्र फडणवीस आणि मी उपमुख्यमंत्री म्हणून अजितदादांसोबत टीम म्हणून काम केले. राजकारणापलीकडची नाती जपणारे अजितदादा आम्हाला मार्गदर्शन करायचे. पंतप्रधान नरेंद्र मोदी आणि केंद्रीय गृहमंत्री अमित शहा यांच्याशीही त्यांचे जिव्हाळ्याचे संबंध होते. सुनेत्रावहिनी पवार यांनी कठीण परिस्थितीत जबाबदारी स्वीकारली असून, संपूर्ण महायुती त्यांच्या आणि पवार कुटुंबीयांच्या पाठीशी खंबीरपणे उभी आहे. अजितदादांचे विकासाचे स्वप्न पूर्ण करणे हीच त्यांना खरी आदरांजली ठरेल, असेही शिंदे यांनी सांगितले. (Ajit Pawar Development Tribute)




संबंधित मजकूर