ऑरेंज गेट-मरीन ड्राइव्ह बोगद्याला आंतरराष्ट्रीय सुरक्षा पुरस्कार

 

मुंबई, : (Orange Gate Marine Drive Tunnel Safety Award)मुंबई महानगर प्रदेश विकास प्राधिकरणाच्या ऑरेंज गेट-मरीन ड्राइव्ह भूमिगत रस्ता बोगदा प्रकल्पाला वर्ल्ड सेफ्टी ऑर्गनायझेशन (WSO) या आंतरराष्ट्रीय संघटनेचा बांधकाम क्षेत्रातील व्यावसायिक आरोग्य, सुरक्षा आणि पर्यावरण व्यवस्थापनातील उत्कृष्टतेसाठीचा पुरस्कार प्रदान करण्यात आला आहे. बांधकामादरम्यान राबविण्यात आलेल्या सुरक्षा उपाययोजना, जोखीम प्रतिबंधक प्रणाली आणि पर्यावरण व्यवस्थापनाची दखल घेत प्रकल्पाला हा सन्मान मिळाला आहे.

 

सातव्या एक्सलन्स पुरस्कार सोहळ्यात प्रकल्पाला गोल्डन ट्रॉफी आणि प्रमाणपत्र देऊन गौरविण्यात आले. या पुरस्कारासाठी कामाच्या ठिकाणी सुरक्षिततेसाठी राबविण्यात येणाऱ्या यंत्रणा, संभाव्य धोके टाळण्यासाठी केलेल्या उपाययोजना आणि पर्यावरणपूरक कार्यपद्धतींचे मूल्यमापन करण्यात आले.(Orange Gate Marine Drive Tunnel Safety Award)

 

पुरस्काराच्या पात्रतेसाठी किमान १० लाख सुरक्षित मनुष्य-तासांचे काम पूर्ण करणे आणि मूल्यमापन कालावधीत कामाशी संबंधित एकही मृत्यू न होणे, या प्रमुख अटी होत्या. याशिवाय, प्रकल्पाची आवश्यक वैधानिक नोंदणी असणे तसेच सुरक्षा किंवा पर्यावरणविषयक नियमांचे उल्लंघन केल्याबद्दल कोणतीही कायदेशीर दोषसिद्धी अथवा प्रलंबित उल्लंघनाची बाब नसणे आवश्यक होते.

 

या प्रक्रियेत संबंधित कागदपत्रांची पडताळणी, स्वतंत्र पथकाकडून प्रत्यक्ष बांधकामस्थळाची पाहणी, सुरक्षा नियमावली आणि बांधकामस्थळावरील जोखीम नियंत्रित करण्यासाठी केलेल्या उपाययोजनांचा आढावा घेण्यात आला.(Orange Gate Marine Drive Tunnel Safety Award)

 

मुंबईतील दाट लोकवस्तीच्या भागातून आणि विद्यमान वाहतूक मार्गांखालून हा भूमिगत बोगदा उभारण्यात येत आहे. त्यामुळे बांधकामादरम्यान कामगारांची सुरक्षितता सुनिश्चित करण्यासोबतच जमिनीवरील वाहतूक आणि आसपासच्या नागरी पायाभूत सुविधांवरील परिणाम मर्यादित ठेवणे महत्त्वाचे आहे. अशा परिस्थितीत बांधकामस्थळावरील स्थितीचे सातत्याने निरीक्षण करणे आणि संभाव्य धोके वेळीच रोखणे आवश्यक ठरते.

 

ऑरेंज गेट-मरीन ड्राइव्ह बोगदा हा मुंबईतील महत्त्वाचा रस्ते संपर्क प्रकल्प आहे. हा बोगदा वाहतुकीसाठी खुला झाल्यानंतर ऑरेंज गेट ते मरीन ड्राइव्हदरम्यानचा प्रवास सुमारे पाच मिनिटांत पूर्ण करता येईल, अशी अपेक्षा आहे. या प्रकल्पामुळे शहरातील महत्त्वाच्या भागांमधील रस्ते संपर्क अधिक सुलभ होण्यास मदत होणार आहे.(Orange Gate Marine Drive Tunnel Safety Award)