कृष्णा-गोदावरी खोऱ्यात ऑईल इंडियाला नैसर्गिक वायूचा शोध

 

मुंबई, : (Oil India natural gas discovery)भारताच्या पूर्व किनारपट्टीवरील कृष्णा-गोदावरी खोऱ्यात सरकारी मालकीच्या ऑईल इंडिया लिमिटेडला नैसर्गिक वायूचा शोध लागला आहे. कंपनीच्या ‘गोदावरी-१’ या मूल्यमापन विहिरीत करण्यात आलेल्या उत्पादन चाचणीदरम्यान प्रतिदिन २ लाख स्टँडर्ड घनमीटर नैसर्गिक वायूचा उच्चांकी प्रवाह नोंदविण्यात आला. देशांतर्गत ऊर्जा उत्पादन वाढविण्याच्या दृष्टीने हा शोध महत्त्वाचा मानला जात आहे.

 

कंपनीने शेअर बाजाराला दिलेल्या माहितीनुसार, कृष्णा-गोदावरी खोऱ्यातील KG-DSF/GSKW/2018 या उथळ समुद्रातील क्षेत्रात हा शोध लागला आहे. या क्षेत्रातील मच्छ्यापुरी भूस्तरात हायड्रोकार्बन्स आढळले. समुद्रातील विहिरीत २,०२४ ते २,०२७ मीटर खोलीदरम्यान हे साठे आढळल्याचे कंपनीने स्पष्ट केले.(Oil India natural gas discovery)

 

दि. १६ ऑक्टोबरपासून या विहिरीची उत्पादन चाचणी सुरू करण्यात आली. सुरुवातीला प्रतिदिन सुमारे एक लाख स्टँडर्ड घनमीटर नैसर्गिक वायूचा प्रवाह नोंदविण्यात आला. पुढील चाचणीदरम्यान हा प्रवाह वाढून प्रतिदिन दोन लाख स्टँडर्ड घनमीटरपर्यंत पोहोचला. याशिवाय, प्रतिदिन सुमारे १७० बॅरल कंडेन्सेटचे उत्पादनही नोंदविण्यात आले. चाचणीदरम्यान विहिरीच्या मुखावरील दाब १,८१५ पीएसआय होता.

 

या विहिरीतील आणखी एका उच्च भूस्तराची चाचणी घेण्याची तयारी कंपनीने सुरू केली आहे. या चाचणीमुळे संबंधित क्षेत्रातील तेल आणि नैसर्गिक वायूच्या संभाव्य साठ्यांविषयी अधिक माहिती मिळण्याची अपेक्षा आहे. मात्र, या शोधाचे व्यावसायिक महत्त्व आणि उपलब्ध साठ्यांचे नेमके प्रमाण पुढील मूल्यांकनानंतर स्पष्ट होईल.(Oil India natural gas discovery)

 

कृष्णा-गोदावरी खोरे हे भारतातील महत्त्वाच्या हायड्रोकार्बन क्षेत्रांपैकी एक आहे. ऑईल इंडियाने २००६ मध्ये नवीन अन्वेषण परवाना धोरणाच्या (NELP) सहाव्या फेरीत मिळालेल्या भूखंडातून या क्षेत्रात अन्वेषण सुरू केले. त्यानंतर २०१९ मध्ये डिस्कव्हर्ड स्मॉल फील्ड्स (DSF) धोरणांतर्गत भूखंड मिळवून कंपनीने आपल्या कामकाजाचा विस्तार केला. या नव्या शोधामुळे कंपनीच्या अन्वेषण कार्याला चालना मिळण्याची शक्यता आहे. तसेच, देशांतर्गत नैसर्गिक वायूचे उत्पादन वाढवून आयात केलेल्या ऊर्जेवरील अवलंबित्व कमी करण्याच्या भारताच्या प्रयत्नांना मदत होऊ शकते.(Oil India natural gas discovery)