EAAA इंडिया ऑल्टरनेटिव्ह्जच्या आयपीओ कडे लक्ष! २६ ऑक्टोबरपासून गुंतवणुकीची संधी; प्रति समभाग किंमतपट्टा १ हजार ५८५ ते १ हजार ६६५ निश्चित

 

 

मुंबई (EAAA India Alternatives IPO 2026) : EAAA इंडिया ऑल्टरनेटिव्ह्ज लिमिटेडचा प्रारंभिक सार्वजनिक समभाग विक्री अर्थात आयपीओ सोमवार, २६ ऑक्टोबर २०२६ रोजी खुला होणार आहे. कंपनीने प्रति समभाग १ हजार ५८५ ते १ हजार ६६५ असा किंमतपट्टा निश्चित केला आहे. हा IPO बुधवार, २८ ऑक्टोबर २०२६ रोजी बंद होईल. गुंतवणूकदारांना किमान ९ समभागांसाठी आणि त्यानंतर ९ समभागांच्या पटीत बोली लावता येणार आहे.

 

प्रति समभाग ५ रूपये दर्शनी मूल्य असलेल्या या आयपीओ अंतर्गत प्रवर्तक एडेलवाईस सिक्युरिटीज अँड इन्व्हेस्टमेंट्स प्रायव्हेट लिमिटेडकडून १ हजार २०० कोटींपर्यंतचे समभाग ऑफर फॉर सेल (OFS) द्वारे विक्रीसाठी उपलब्ध करून दिले जाणार आहेत. (EAAA India Alternatives IPO 2026)

 

२००८ मध्ये स्थापन झालेली EAAA इंडिया ऑल्टरनेटिव्ह्ज लिमिटेड ही भारतातील आघाडीच्या पर्यायी गुंतवणूक व्यवस्थापन प्लॅटफॉर्मपैकी एक आहे. केअरच्या अहवालानुसार, ३० जून २०२६ पर्यंत कंपनीच्या व्यवस्थापनाखालील मालमत्तेचे (AUM) मूल्य ₹९५ हजार ३४४.८ कोटी होते. कंपनीला दीर्घकालीन भांडवल व्यवस्थापनाचा १७ वर्षांहून अधिक अनुभव आहे. (EAAA India Alternatives IPO 2026)

 

कंपनीच्या प्रमुख व्यवसायांमध्ये रिअल ॲसेट्स आणि प्रायव्हेट क्रेडिट यांचा समावेश आहे. रिअल ॲसेट्स विभाग इक्विटी, क्वासी-इक्विटी आणि डेट साधनांच्या मिश्रणातून गुंतवणूक करतो. तर प्रायव्हेट क्रेडिट विभाग प्रामुख्याने डेट आणि कन्व्हर्टिबल डेट साधनांमध्ये गुंतवणूक करून जोखमीच्या तुलनेत परतावा मिळवण्यावर भर देतो.

 

कंपनीची संपूर्ण मालकीची उपकंपनी सेकुरा इंडिया मॅनेजमेंट लिमिटेड मालमत्तांच्या संचालन आणि व्यवस्थापनाशी संबंधित कामकाज सांभाळते. यामध्ये ऑपरेशन्स, देखभाल, देखरेख, कार्यक्षमता सुधारणे आणि व्यवसाय पुनरुज्जीवन व्यवस्थापन यांचा समावेश आहे. (EAAA India Alternatives IPO 2026)

 

दि. ३० जून २०२६ पर्यंत कंपनीची शुल्क मिळवून देणाऱ्या व्यवस्थापनाखालील मालमत्ता (FPAUM) ४८ हजार ६२३.१ कोटी होती. कंपनीच्या माहितीनुसार, आर्थिक वर्ष २०२६ मध्ये अंदाजे २३.४३ टक्के चक्रवाढ वार्षिक वाढीच्या दराने हा आकडा ४४ हजार ७१०.४ कोटींवर पोहोचला होता. कंपनीचे बहुतांश मोठे फंड त्यांच्या तिसऱ्या किंवा चौथ्या मालिकेत आहेत अथवा त्या टप्प्यात प्रवेश करत आहेत. या विविध मालिकांमध्ये कंपनीने सातत्याने भांडवल उभारणी केली आहे. (EAAA India Alternatives IPO 2026)

 

गेल्या तीन आर्थिक वर्षांत आणि दि. ३० जून २०२६ रोजी संपलेल्या तीन महिन्यांच्या कालावधीत कंपनीने एकूण ४७ हजार ५२६.२ कोटींच्या भांडवलाची वचनबद्धता मिळवली. याच कालावधीत ३८ हजार २२९.३ कोटींची गुंतवणूक प्रत्यक्ष तैनात करण्यात आली, तर ३१ हजार २३२.९ कोटींच्या गुंतवणुकीतून निर्गमन किंवा वसुली करण्यात आली. कंपनीच्या बहुतांश निधींनी वेगवेगळ्या बाजारचक्रांमध्ये कामगिरी केल्याची नोंद आहे.

 

३० जून २०२६ पर्यंत कंपनीने जागतिक आणि भारतीय बाजारपेठांमध्ये एकूण ११ हजार ००९ ग्राहकसंबंध प्रस्थापित केले होते. यामध्ये एकापेक्षा अधिक निधींमध्ये गुंतवणूक करणाऱ्या १ हजार ४९३ पुनरावृत्ती ग्राहकांचा समावेश होता. दि. १ एप्रिल २०२३ ते दि. ३० जून २०२६ या कालावधीत कंपनीशी ८ हजार ८०० नवीन ग्राहकसंबंध जोडले गेले. (EAAA India Alternatives IPO 2026)

 

कंपनीच्या AUM पैकी सुमारे ७७ टक्के हिस्सा पुनरावृत्ती ग्राहकांच्या गुंतवणूक वचनबद्धतेतून आला होता. तिच्या ग्राहकवर्गात पेन्शन फंड, विमा कंपन्या आणि बँकांसारख्या संस्थात्मक गुंतवणूकदारांचा मोठा वाटा आहे. ३० जून २०२६ पर्यंत संस्थात्मक ग्राहकांचा कंपनीच्या AUM मधील हिस्सा सुमारे ४९.३२ टक्के होता.

 

कंपनीचा ग्राहकवर्ग भारतासह उत्तर अमेरिका आणि युरोपमधील विविध बाजारपेठांमध्ये पसरलेला आहे. मुंबई, नवी दिल्ली, गिफ्ट सिटी आणि सिंगापूर येथे कंपनीची उपस्थिती आहे. दि. ३० जून २०२६ पर्यंत कंपनीच्या गुंतवणूक पथकात ८५ अनुभवी व्यावसायिक कार्यरत होते. कंपनीने व्यापक जोखीम व्यवस्थापन आराखडाही लागू केला आहे. (EAAA India Alternatives IPO 2026)

 

ॲक्सिस कॅपिटल लिमिटेड, जेफरीज इंडिया प्रायव्हेट लिमिटेड, मोतीलाल ओसवाल इन्व्हेस्टमेंट ॲडव्हायझर्स लिमिटेड आणि नुवामा वेल्थ मॅनेजमेंट लिमिटेड हे या IPO चे बुक-रनिंग लीड मॅनेजर आहेत. एमयूएफजी इनटाईम इंडिया प्रायव्हेट लिमिटेड या इश्यूचे रजिस्ट्रार आहेत.

 

हा इश्यू सेबीच्या ICDR नियमांनुसार बुक-बिल्डिंग प्रक्रियेद्वारे आणला जात आहे. यामध्ये पात्र संस्थात्मक खरेदीदारांसाठी (QIBs) ५० टक्क्यांपर्यंत, बिगर-संस्थात्मक गुंतवणूकदारांसाठी (NIIs) किमान १५ टक्के आणि किरकोळ वैयक्तिक गुंतवणूकदारांसाठी (RIIs) किमान ३५ टक्के हिस्सा राखीव ठेवण्यात येणार आहे. (EAAA India Alternatives IPO 2026)