७०० डिजिटल व्हिडिओ अन् बालविवाह रोखणारे ’माऊली’ हाथ; महाराष्ट्राच्या चार आदर्श शिक्षकांचा राष्ट्रपतींच्या हस्ते सन्मान

 

 

नवी दिल्ली (National Teacher Award 2026) : शिक्षक दिनाचे औचित्य साधून, दि. ५ सप्टेंबर रोजी नवी दिल्लीतील विज्ञान भवन येथे आयोजित अत्यंत दिमाखदार सोहळ्यात राष्ट्रपती द्रौपदी मुर्मू यांच्या हस्ते महाराष्ट्रातील चार आदर्श शिक्षकांना ’राष्ट्रीय शिक्षक पुरस्कार २०२६’ प्रदान करून सन्मानित करण्यात आले. यावेळी राष्ट्रपती द्रौपदी मुर्मु यांनी प्रतिपादन केले की भारताला ’विकसित भारत’ बनवण्याचे स्वप्न केवळ आणि केवळ देशातील शिक्षकांच्याच हाती आहे. जो समाज आपल्या शिक्षकांचा मनापासून आदर करतो, तोच खर्‍या अर्थाने प्रगती करू शकतो," केंद्रीय शिक्षण मंत्रालयाने जाहीर केलेल्या देशभरातील उत्कृष्ट शिक्षकांमध्ये महाराष्ट्राच्या चार शिलेदारांचा समावेश असून, त्यांच्या कल्पक, डिजिटल आणि सामाजिक प्रयोगांची दखल राष्ट्रीय स्तरावर घेण्यात आली आहे. युट्युबवर ७०० हून अधिक गणिताचे व्हिडिओ बनवून हा विषय सोपा करणारे लातूरचे वैभव कुलकर्णी असोत, की ऊसतोड कामगारांच्या मुलींचे बालविवाह रोखून त्यांना शिक्षणाच्या मुख्य प्रवाहात आणणार्‍या नाशिक आणि बीडच्या शिक्षिका असोत; या चारही शिक्षकांनी राज्याच्या शैक्षणिक शिरपेचात मानाचा तुरा रोवला आहे.