नक्षलमुक्त भारत झाला, आता नशामुक्त भारत घडवूया; २०२९चे लक्ष्य, ड्रग माफियांच्या नेटवर्कवर निर्णायक प्रहार!

 

  

मुंबई (Nasha Mukt Bharat 2029) : नक्षलवादाची जवळपास सहा दशकांची समस्या संपवल्यानंतर आता देशाच्या तरुणाईला नशेच्या विळख्यातून मुक्त करण्याची निर्णायक लढाई सुरू झाली आहे. “नक्षलमुक्त भारत झाला, आता नशामुक्त भारत घडवूया,” असा निर्धार केंद्रीय गृहमंत्री अमित शाह यांनी व्यक्त केला. २०२९ पर्यंत भारताला नशामुक्त करण्यासाठी केंद्र आणि राज्य सरकारांच्या समन्वयातून तीन वर्षांचा मिशन मोड रोडमॅप तयार करण्यात आला असून, ही लढाई केवळ ड्रग्ज जप्त करण्यापुरती मर्यादित न ठेवता संपूर्ण तस्करीचे नेटवर्क, आर्थिक साखळी आणि मागणीवर एकाच वेळी प्रहार करण्याची रणनीती आखण्यात आली आहे. केंद्रीय गृहमंत्री अमित शाह स्वतः भारतातील सर्वच राज्यांना भेट देणार आहे.

 

केंद्रीय गृहमंत्री अमित शाह रविवार, दि. ६ सप्टेंबरपासून गोव्याच्या तीन दिवसांच्या दौऱ्यावर आहे. दौऱ्याच्या पहिल्याच दिवशी शाह यांनी नार्कोटिक्स नियंत्रण आणि नशामुक्त भारत अभियानावर केंद्र सरकारच्या उपाययोजनांची माहिती देणारी पत्रकार परिषद घेतली. यावेळी गोव्याचे मुख्यमंत्री डॉ. प्रमोद सावंत ही होते. केंद्रीय गृहमंत्री अमित शाह यांनी सांगितले की, २०१९ नंतर नार्कोटिक्सविरोधातील कारवाईला राष्ट्रीय सुरक्षेच्या प्राधान्याचा दर्जा देण्यात आला. पूर्वी वेगवेगळ्या यंत्रणा स्वतंत्रपणे कारवाई करत असत; मात्र आता केंद्र, राज्य, पोलीस आणि विविध केंद्रीय संस्थांमध्ये समन्वय निर्माण करण्यात आला आहे. चार-स्तरीय एनसीओआरडी यंत्रणा, राज्यांतील अँटी-नार्कोटिक्स टास्क फोर्स आणि संयुक्त समन्वय समितीच्या माध्यमातून मोठ्या नेटवर्कवर कारवाई केली जात आहे. (Nasha Mukt Bharat 2029)