२८ वर्षांनंतर वेटलिफ्टिंगमध्ये भारताला रौप्यपदक! भारतीय स्टार वेटलिफ्टर मीराबाई चानूची ऐतिहासिक कामगिरी!

 

मुंबई (Mirabai Chanu Asian Games 2026): भारतीय स्टार वेटलिफ्टर मीराबाई चानू हिने एशियन गेम्स २०२६ मध्ये ऐतिहासिक कामगिरी करत भारताला रौप्यपदक पटकावून दिले आहे. एशियन गेम्सच्या इतिहासात मीराबाईचे हे पहिलेच पदक ठरले आहे. महिलांच्या ४९ किलो वजनी गटात मीराबाईने स्नॅचमध्ये ८७ किलो आणि क्लीन अँड जर्कमध्ये १११ किलो असे एकूण १९८ किलो वजन उचलत ही यशस्वी कामगिरी केली. तब्बल २८ वर्षांनंतर भारताला वेटलिफ्टिंगमध्ये पुन्हा रौप्यपदक मिळाले आहे. या स्पर्धेत उत्तर कोरियाच्या री सोंग-गम हिने एकूण २१५ किलो वजन उचलून सुवर्णपदकावर आपले नाव कोरले. एशियन गेम्समधील री सोंग-गमचे हे सलग तिसरे सुवर्णपदक आहे.(Mirabai Chanu Asian Games 2026)

 

 

 

सन १९५१ मध्ये एशियन गेम्समध्ये वेटलिफ्टिंगचा समावेश झाल्यापासून भारताने आतापर्यंत एकूण १५ पदके (६ रौप्य आणि ९ कांस्य) जिंकली आहेत. मात्र, सुवर्णपदकाची प्रतीक्षा अजूनही कायम आहे. १९९८ च्या बँकॉक एशियन गेम्समध्ये कर्णम मल्लेश्वरी हिने रौप्यपदक जिंकले होते. त्यानंतर तब्बल २८ वर्षांच्या दीर्घ प्रतीक्षेनंतर मीराबाई चानूच्या रूपाने भारताला वेटलिफ्टिंगमध्ये पुन्हा रौप्यपदक मिळाले आहे. (Mirabai Chanu Asian Games 2026)

 

 

 

मीराबाई चानूचा एशियन गेम्समधील प्रवास २०१४ च्या इंचियोन स्पर्धेपासून सुरू झाला. त्यावेळी महिलांच्या ४८ किलो गटात ती नवव्या स्थानावर राहिली होती. २०१८ च्या जकार्ता एशियन गेम्समध्ये दुखापतीमुळे तिला सहभागी होता आले नाही. त्यानंतर २०२२ च्या हांगझोऊ एशियन गेम्समध्ये पुनरागमन करत तिने महिलांच्या ४९ किलो गटात १९१ किलो वजन उचलून चौथे स्थान मिळवले होते. आता २०२६ मध्ये तिने अखेर एशियन गेम्सचे पहिले पदक आपल्या नावावर केले आहे. (Mirabai Chanu Asian Games 2026)