डॉ.काशिनाथ घाणेकर नाट्यगृहाचा होणार कायापालट!

 

ठाणे : (KashinathGhanekarNatyagriha) गेल्या अनेक वर्षांपासून मोठ्या दुरुस्तीच्या प्रतीक्षेत असलेल्या ठाण्यातील डॉ. काशिनाथ घाणेकर नाट्यगृहाच्या सर्वांगीण नूतनीकरणाचे काम अखेर हाती घेण्यात आले आहे. २०११ मध्ये नाट्यगृह सुरू झाल्यानंतर आतापर्यंत कोणतेही मोठे दुरुस्तीचे काम करण्यात आले नव्हते. त्यामुळे आता नाट्यगृहाचा संपूर्ण कायापालट करण्याचा निर्णय घेण्यात आला असून, या कामासाठी जवळपास सहा महिन्यांचा कालावधी लागण्याची शक्यता संबंधित बांधकाम विभागाकडून व्यक्त करण्यात आली आहे. काम पूर्ण झाल्यानंतर १ जानेवारीपासून घाणेकर नाट्यगृह रसिकांना नव्या आणि अधिक सुविधायुक्त रूपात पाहायला मिळणार आहे.

 

नाट्यगृहाच्या नूतनीकरणामध्ये केवळ किरकोळ दुरुस्ती न करता विविध बाबींची व्यापक कामे करण्यात येणार आहेत. संपूर्ण नाट्यगृहाचे रंगकाम, वॉशरूम्सचे नूतनीकरण, सीलिंग आणि फॉल्स सीलिंगची कामे, दरवाजे आणि खिडक्यांची दुरुस्ती तसेच आवश्यक ठिकाणी नवीन कामे करण्यात येणार आहेत. त्याचबरोबर गेस्ट रूम, व्हीआयपी रूम आणि ग्रीन रूममधील फर्निचरचेही नूतनीकरण करण्यात येणार आहे. (KashinathGhanekarNatyagriha)

 

 

घाणेकर नाट्यगृहाचे नूतनीकरणाचे काम पावसाळ्यातच करण्यात यावे, अशी मागणी नाट्य क्षेत्रातील संस्था आणि नाट्यसंस्थांकडून करण्यात आली होती. पावसाळ्याच्या काळात तुलनेने नाट्यप्रयोगांचे आयोजन कमी होत असल्याने या कालावधीचा उपयोग दुरुस्ती आणि नूतनीकरणाच्या कामासाठी करावा, या मागणीचा विचार करूनच नाट्यगृह बंद ठेवण्याचा निर्णय घेण्यात आला आहे.या नियोजनानुसार १ जुलैपासून मिनी थिएटर बंद करण्यात आले आहे, तर १ ऑगस्टपासून मुख्य नाट्यगृहही नूतनीकरणाच्या कामासाठी बंद ठेवण्यात आले आहे. त्यामुळे पावसाळ्याचा कालावधी नाट्यगृहाच्या दुरुस्तीच्या कामासाठी वापरला जात असून, नाट्यप्रयोगांवर कमीत कमी परिणाम होईल याची काळजी घेण्यात आली आहे. (KashinathGhanekarNatyagriha)

 

 

नूतनीकरणाच्या कामात संपूर्ण इमारतीच्या अंतर्गत स्वरूपासोबतच कलाकार आणि मान्यवरांसाठी असलेल्या सुविधांमध्येही सुधारणा करण्यात येणार आहे. गेस्ट रूम, व्हीआयपी रूम आणि ग्रीन रूममधील फर्निचर नव्याने तयार करण्यात येणार असल्याने कलाकारांना अधिक चांगल्या सुविधा उपलब्ध होणार आहेत.तसेच वॉशरूम, फॉल्स सीलिंग, दरवाजे, खिडक्या आणि इतर आवश्यक बाबींची दुरुस्ती व नूतनीकरण करण्यात येणार असल्याने नाट्यगृहाचा एकूणच चेहरामोहरा बदलणार आहे. (KashinathGhanekarNatyagriha)

 

 

" संपूर्ण नूतनीकरणाच्या कामाला किमान सहा महिन्यांचा कालावधी लागण्याची शक्यता आहे. १ जुलैपासून मिनी थिएटर बंद करून कामाला सुरुवात करण्यात आली असून, मुख्य नाट्यगृह १ ऑगस्टपासून बंद ठेवण्यात आले आहे. ही कामे डिसेंबरपर्यंत पूर्ण करण्याचे नियोजन आहे.त्यामुळे १ जानेवारीपासून घाणेकर नाट्यगृह नव्या रूपात पुन्हा रसिक, कलाकार आणि नाट्यप्रेमींच्या सेवेत दाखल होणार आहे" 

 

-प्रमोद घारेकर,नाट्यगृह व्यवस्थापक