पूरग्रस्तांना एनडीआरएफच्या निकषांनुसार मदत

 

नागपूर : (Nagpur) महानगरपालिका व जिल्हा प्रशासनाकडून नुकसानग्रस्त भागांचा पंचनामा पूर्ण करण्यात आला असून एनडीआरएफच्या निकषांनुसार नुकसान भरपाई देण्याची प्रक्रिया सुरू असल्याची माहिती महसूलमंत्री चंद्रशेखर बावनकुळे यांनी दिली. महसूल मंत्री तथा नागपूर आणि अमरावती जिल्ह्याचे पालकमंत्री चंद्रशेखर बावनकुळे यांनी शुक्रवारी नागपूर विमानतळावर प्रसारमाध्यमांशी संवाद साधत विविध विषयांवर भूमिका स्पष्ट केली.

 

नागपूरमधील पूरस्थितीबाबत बोलताना श्री. बावनकुळे म्हणाले की, महानगरपालिका व जिल्हा प्रशासनाकडून नुकसानग्रस्त भागांचा पंचनामा पूर्ण करण्यात आला आहे. एनडीआरएफच्या निकषांनुसार नुकसानभरपाई देण्याची प्रक्रिया सुरू असून या संदर्भात आपण स्वतःही आढावा घेतल्याचे त्यांनी सांगितले. (Nagpur)

 

 

अल्पवयीन मुलीवरील अत्याचाराच्या घटनेची गंभीर दखल घेत दोषींवर कठोर कारवाई करण्याचे निर्देश देण्यात आल्याचे त्यांनी स्पष्ट केले. तसेच येत्या सोमवारी पोलीस आयुक्त कार्यालयात बैठक घेऊन नागपुरातील कायदा व सुव्यवस्थेचा आढावा घेतला जाणार असून भविष्यात अशा घटना टाळण्यासाठी आवश्यक उपाययोजना करण्यात येतील, असे त्यांनी सांगितले. (Nagpur)

 

 

मनोज जरांगे यांच्या वक्तव्यावर प्रतिक्रिया देताना त्यांनी सांगितले की, जात वैधता समिती ही स्वतंत्र संस्था असून हे प्रकरण उच्च न्यायालयाच्या कार्यक्षेत्रातील आहे. मुख्यमंत्री, आमदार किंवा कोणत्याही राजकीय पक्षाला या प्रक्रियेत हस्तक्षेप करण्याचा अधिकार नाही. एक टक्क्यांपेक्षा कमी अर्ज नाकारण्यात आले असून सुमारे ९९ टक्के प्रकरणांमध्ये वैधता प्रमाणपत्रे देण्यात आली आहेत. सर्व समाजांना समान निकषांवर न्याय दिला जात असल्याचे त्यांनी स्पष्ट केले. (Nagpur)