महिलाद्वेष्टी काँग्रेस

 

सत्ता हातची गेल्यानंतरही तामिळनाडूचे माजी मुख्यमंत्री एम. के. स्टॅलिन यांचे दिवटे आणि राज्याचे माजी उपमुख्यमंत्री उदयनिधीला आपल्या वाचाळवाणीला लगाम घालता आलेला नाहीच. पण, आता सत्तेत नसतानाही उदयनिधीकडून होणारी उथळ विधाने ही निव्वळ राजकीय अहंकार आणि घराणेशाहीचा दर्पच अधोरेखित करणारी ठरावी. कालही तामिळनाडूत उदयनिधीच्या अशाच एका टिप्पणीने नवीन वादाला तोंड फोडले आणि हा वाद अगदी न्यायालयापर्यंतही गेला.

 

त्याचे झाले असे की, कावेरी नदीच्या जलवाटपासंबंधी सभेला उदयनिधी संबोधित करीत होता. यावेळी समोरच्या गर्दीतून ‘तृषा...तृषा’ अशी घोषणाबाजी करण्यात आली. ही तृषा कोण, तर तामिळनाडूचे मुख्यमंत्री विजय यांची खास मैत्रिण. आता या घोषणा ऐकल्यानंतर उदयनिधीने खरेतर त्याकडे दुर्लक्ष करणेच अपेक्षित होते. पण, समोरच्या घोषणांनी उदयनिधीलाही चेव चढला आणि तृषाचे नाव न घेता, "पाणी इतर कुठेही पोहोचो वा न पोहोचो, ते तिथे मात्र पोहोचलेच पाहिजे,” असे म्हणून पुढे लगेचच, "माझा उद्देश कावेरीबद्दल बोलण्याचा होता,” अशीही सारवासारव केली. उदयनिधीने साधलेली ही द्वयर्थी टिप्पणी निश्चितच निंदनीय होती. मुख्यमंत्री विजय यांच्यावर, सरकारच्या ध्येय-धोरणांवर विरोधी पक्षनेते म्हणून उदयनिधीला टीकेचा अधिकार आहेच; पण मुख्यमंत्र्यांच्या खासगी आयुष्यातील व्यक्तीवर अशी खोचक टिप्पणी करणे, हे राजकीय अपरिपक्वतेचेच लक्षण म्हणावे लागेल. मग काय, प्रकरण पोलिसांत आणि लगोलग न्यायालयातही गेले. न्यायालयाने उदयनिधीच्या मुक्ततेचे आदेश पोलिसांना दिले; पण पोलीस, कोर्टकचेरीला उदयनिधी तसा सरावलेलाच. कारण, सनातनची तुलना डेंग्यू, मलेरियाशी करून त्याच्या उच्चाटनाची नीच भाषा करणार्‍या उदयनिधीला न्यायालयानेही चांगलेच झापले होते. पण, उदयनिधीसारख्यांना त्याची ना खंत ना खेद. त्यामुळे मुख्यमंत्री विजय यांनी पोलीस कारवाईतून चांगलाच इंगा दाखवून उर्मट उदयनिधीला सूचक इशारा दिला आहे. त्यातून उदयनिधीने धडा घेतला तर ठीक. कारण, आता दीर्घकालीन बचावासाठी सत्तेची कवचकुंडले हाती नाहीत, हे ध्यानी

असलेले बरे!