लष्कर-ए-तैयबाची मोठी कबुली; ३० हून अधिक दहशतवादी ठार!

 

मुंबई : (Lashkar E Taiba) पाकिस्तानी दहशतवादी संघटना लष्कर-ए-तैयबाच्या एका कमांडरने प्रथमच सार्वजनिकरीत्या कबूल केले आहे की, गेल्या तीन ते चार वर्षांत पाकिस्तान आणि पाकिस्तानव्याप्त काश्मीर येथे संघटनेचे ३० हून अधिक दहशतवादी मारले गेले आहेत. यात भारतासाठी काम करणाऱ्या ‘अज्ञात बंदूकधाऱ्यांचा’ सहभाग असल्याचा दावा या कमांडरने केला आहे. लष्कर-ए-तैयबाचा कमांडर रिजवान हनीफ याने एका भाषणादरम्यान हा दावा केला असून, त्याचा व्हिडिओ सध्या सोशल मीडियावर मोठ्या प्रमाणात व्हायरल होत आहे.

 

मिळालेल्या माहितीनुसार, रिजवान हनीफ हा पाकिस्तानव्याप्त काश्मीरमधील लष्कर-ए-तैयबाचा उपप्रमुख मानला जातो. सीमापार घुसखोरी, दहशतवाद्यांची भरती, शस्त्रास्त्रे व इतर संसाधनांची व्यवस्था तसेच पीपल्स अँटी-फॅसिस्ट फ्रंट (पीएएफएफ) सारख्या संघटनेच्या सहयोगी नेटवर्कशी समन्वय साधण्याची महत्त्वाची जबाबदारी त्याच्याकडे असल्याचे सांगितले जाते. आपल्या भाषणात हनीफने सांगितले की, गेल्या काही वर्षांत पेशावर, कराची, रावळपिंडी, रावळकोट आणि मुजफ्फराबादसह अनेक शहरांमध्ये लष्कर-ए-तैयबाचे ३० हून अधिक कार्यकर्ते मारले गेले आहेत. या हत्या भारताच्या गुप्तचर यंत्रणेशी संबंधित ‘अज्ञात बंदूकधाऱ्यांनी’ केल्याचा आरोप त्याने केला.(Lashkar E Taiba)

 

मात्र, हा आरोप करताना हनीफने भारताचा या हत्यांशी संबंध असल्याचे कोणतेही ठोस किंवा पडताळून पाहता येईल असे पुरावे सादर केले नाहीत. तसेच हल्लेखोरांची ओळखही त्याने उघड केली नाही. भारताला या घटनांसाठी जबाबदार धरण्याचा प्रयत्न त्याने केला असला, तरी त्याच्या आरोपांच्या समर्थनार्थ कोणतेही विश्वसनीय किंवा सत्यापित पुरावे समोर ठेवलेले नाहीत. तरीही, गेल्या काही वर्षांत लष्कर-ए-तैयबाच्या अनेक सदस्यांचा मृत्यू झाल्याची त्याने दिलेली सार्वजनिक कबुली ही पाकिस्तान आणि पाकिस्तानव्याप्त काश्मीरमध्ये संघटनेला झालेल्या नुकसानीबाबत या दहशतवादी संघटनेच्या वरिष्ठ पदाधिकाऱ्याकडून आलेल्या सर्वात स्पष्ट कबुलीजबाबांपैकी एक मानली जात आहे.(Lashkar E Taiba)