स्वतंत्र सर्वेक्षणातील नोंदी आणि मसुदा EIA मधील नोंदींमध्ये मोठी तफावत असल्याचा दावा मानद वन्यजीव रक्षक अविनाश हरड यांनी केला आहे. माशांच्या सर्वेक्षणाबाबतचा आक्षेप अधिक गंभीर असल्याचे पर्यावरण अभ्यासक जेहू नाडर यांचे म्हणणे आहे. मसुदा EIA मध्ये प्रकल्पातील नदीच्या विविध भागांत माशांचे सर्वेक्षण होऊ शकले नसल्याचे नमूद करण्यात आले आहे. त्यानंतर २०१६ मधील काळू धरणाच्या अभ्यासावर आधारित २६ माशांची यादी वापरण्यात आली आहे. मात्र, हे काळू धरण अहमदनगर जिल्ह्यातील पारनेर तालुक्यातील धावळपुरी येथे असून, मुरबाडमधील प्रकल्पस्थळापासून सुमारे १५० किलोमीटर अंतरावर आहे. त्यामुळे प्रकल्पाच्या प्रत्यक्ष नदीप्रणालीतील मत्स्य जैवविविधतेचे चित्र या आधारे स्पष्ट होत नसल्याचा दावा करण्यात आला आहे. या प्रकल्पाच्या परिसरात पश्चिम घाटातील संवेदनशील जैवविविधता असल्याचे स्वतंत्र सर्वेक्षणात नमूद करण्यात आले आहे. सर्वेक्षणानुसार नोंदवलेल्या ७७७ प्रजातींपैकी ९४ प्रजाती पश्चिम घाट प्रदेशनिष्ठ (Western Ghats endemic) आहेत. तसेच ४२ प्रजाती वन्यजीव संरक्षण कायदा, २०२२ अंतर्गत अनुसूची १ मध्ये, १५१ प्रजाती अनुसूची २ मध्ये आणि सात प्रजाती अनुसूची तीनमध्ये असल्याचे या यादीत नमूद आहे.