स्फोटकांच्या संशयावरून मालेगावात एटीएसची धडक कारवाई; बरकतिया मशिदीसह घरांची पहाटे झडती

गुप्त माहितीच्या आधारे संबंधित पथकांनी इस्लामपुरा भागात सुमारे अडीच ते तीन तास तपासणी केली. या कारवाईदरम्यान परिसरातील सुमारे सव्वाशे वर्षे जुनी बरकतिया मशीद तसेच दोन ते तीन घरांची झडती घेण्यात आली. सुरक्षेच्या दृष्टीने मोठा पोलिस बंदोबस्त तैनात करण्यात आला होता.(Malegaon ATS Operation)

 

विशेष म्हणजे, मालेगाव शहरात प्रथमच मध्यरात्रीच्या सुमारास एखाद्या प्रार्थनास्थळाची अशा प्रकारे व्यापक सुरक्षा व्यवस्थेत तपासणी करण्यात आल्याचे सांगितले जात आहे. त्यामुळे या कारवाईची शहरात जोरदार चर्चा सुरू झाली आहे. एटीएससह विविध तपास यंत्रणांनी परिसराची बारकाईने पाहणी करत संभाव्य धोका अथवा संशयास्पद वस्तूंचा शोध घेतला. मात्र, तपासणीदरम्यान कोणतीही स्फोटके, संशयास्पद अथवा आक्षेपार्ह वस्तू आढळून आली नसल्याची प्राथमिक माहिती आहे. त्यामुळे तपासणी पूर्ण केल्यानंतर सर्व पथके तेथून माघारी परतली.(Malegaon ATS Operation)

 

या कारवाईसाठी मालेगावातूनच स्फोटकांबाबतची गुप्त माहिती मिळाल्यानेही आश्चर्य व्यक्त केले जात आहे. माहितीचा नेमका स्रोत, तिची सत्यता आणि त्यामागील पार्श्वभूमी याबाबत अधिकृत तपशील अद्याप समोर आलेला नाही. त्यामुळे तपास यंत्रणांकडून मिळालेल्या माहितीची पडताळणी केली जात असल्याची शक्यता आहे. दरम्यान, कारवाईच्या पार्श्वभूमीवर इस्लामपुरा परिसरात काही काळ तणावाचे वातावरण निर्माण झाले होते.(Malegaon ATS Operation)

 

मात्र, कोणतीही आक्षेपार्ह वस्तू अथवा स्फोटक सामग्री आढळून न आल्याने परिस्थिती नियंत्रणात राहिली. या कारवाईनंतरही संबंधित यंत्रणांकडून गुप्त माहितीची पडताळणी आणि पुढील तपास सुरू राहण्याची शक्यता आहे. मालेगावसारख्या संवेदनशील शहरात एटीएससह अनेक सुरक्षा यंत्रणांनी एकाच वेळी केलेल्या या कारवाईमुळे सुरक्षा व्यवस्थेच्या दृष्टीनेही या घटनेकडे गांभीर्याने पाहिले जात आहे. मात्र, तपास पूर्ण होईपर्यंत या कारवाईबाबत कोणताही निष्कर्ष काढणे घाईचे ठरणार आहे.(Malegaon ATS Operation)