काश्मीरमध्ये ३६ वर्षांनंतर तपासाला वेग; कवी सरवानंद कौल प्रेमी दुहेरी हत्याकांडाप्रकरणी 'SIA' चे नऊ ठिकाणी मोठे छापे

श्रीनगर (Kashmir Double Murder Case) : जम्मू-काश्मीरमधील दहशतवादाच्या सुरुवातीच्या काळातील एका अत्यंत क्रूर आणि संवेदनशील हत्याकांडाचा छडा लावण्यासाठी राज्य तपास संस्थेने ३६ वर्षांनंतर पुन्हा एकदा कायदेशीर मोहीम उघडली आहे प्रसिद्ध काश्मिरी पंडित कवी, लेखक आणि समाजसेवक सरवानंद कौल 'प्रेमी' आणि त्यांच्या मुलाच्या १९९० मधील दुहेरी हत्याकांडाप्रकरणी ’SIA’ने आज, १२ ऑगस्ट २०२६ रोजी पहाटे काश्मीर खोर्‍यात आणि जम्मूमधील एकूण नऊ वेगवेगळ्या संशयित ठिकाणांवर एकाच वेळी धडक छापे टाकले. दि. २९ एप्रिल १९९० रोजी अनंतनाग जिल्ह्यातील सोफ-शली (दूरू) गावातील रहिवासी असलेले ८६ वर्षीय सरवानंद कौल ’प्रेमी’ हे खोर्‍यातील एक आदरणीय व्यक्तिमत्त्व होते त्यांनी 'भगवद्गीते' चा काश्मिरी भाषेत उत्कृष्ट अनुवाद केला होता आणि ते धार्मिक सलोख्याचे प्रतीक मानले जात . स्थानिक मुस्लिम समुदायातही त्यांना प्रचंड आदर असल्यामुळे त्यांनी इतर पंडितांप्रमाणे काश्मीर खोरे सोडून न जाण्याचा निर्णय घेतला होता. मात्र, दि. २९ एप्रिल १९९० च्या रात्री तीन सशस्त्र दहशतवाद्यांनी त्यांच्या घरात बळजबरीने प्रवेश केला. त्यांनी घरातील दागिने आणि मौल्यवान वस्तू लुटल्या आणि सरवानंद कौल प्रेमी यांच्यासह त्यांचा २७ वर्षांचा तरुण मुलगा वीरेंद्र कौल यांचे बंदुकीच्या धाकावर अपहरण केले. दोन दिवसांनंतर, दि. १ मे १९९० रोजी, त्यांचे छिन्नविच्छिन्न झालेले मृतदेह त्यांच्या गावापासून काही अंतरावर एका झाडाला लटकवलेल्या अवस्थेत आढळले होते. त्यांच्या शरीरावर सिगारेटचे चटके आणि अमानुष छळाच्या भीषण खुणा होत्या. या क्रूर हत्याकांडामुळे संपूर्ण काश्मीर हादरले होते. (Kashmir Double Murder Case)