अयोध्येच्या धर्तीवर ६ डिसेंबर रोजी मथुरेत होणार कारसेवा!

 

मुंबई : (Krishna Janmabhoomi Karseva) श्रीकृष्ण जन्मभूमी मुक्ती आंदोलनाबाबत साधू-संतांनी मोठी घोषणा केली आहे. दि. ९ ऑगस्ट रोजी प्रस्तावित असलेली कारसेवा तूर्तास स्थगित करण्यात आली असून येत्या ६ डिसेंबर रोजी मथुरेत कारसेवा करण्याची घोषणा करण्यात आली आहे. चित्रगुप्त पीठाधीश्वर डॉ. स्वामी सच्चिदानंद महाराज यांनी साधू-संतांच्या उपस्थितीत घंटे-घडियाळ आणि शंखनादाच्या गजरात सदर घोषणा केली. दि. ६ डिसेंबर १९९२ रोजी अयोध्येत बाबरी ढाचा पाडण्यात आता होता, त्याच पार्श्वभूमीवर ही कारसेवा करण्यात येणार असल्याचे साधू-संतांनी सांगितले.(Krishna Janmabhoomi Karseva)

 

स्वामी सच्चिदानंद महाराज यांनी स्पष्ट केले की, ६ डिसेंबरपूर्वी ते स्वतः देशभर फिरून साधू-संत, आखाडा परिषदेचे महंत आणि महामंडलेश्वर यांची भेट घेणार आहेत. तसेच त्यांना मथुरेत पोहोचून कारसेवेत सहभागी होण्याचे आवाहन करणार आहेत. स्वामी सच्चिदानंद महाराज यांनी ६ डिसेंबरपूर्वी येणाऱ्या श्रीकृष्ण जन्माष्टमीच्या दिवशी ठाकूरजींना भोग अर्पण करण्याची परवानगी न्यायालयाकडून मागितली आहे. आपल्या मागणीपत्रात वर्शिप ॲक्ट रद्द करण्याची मागणी केली असून श्रीकृष्ण जन्मभूमी प्रकरणाची सुनावणी फास्ट-ट्रॅक न्यायालयात घेण्याची मागणीही त्यांनी केली आहे.(Krishna Janmabhoomi Karseva)

 

चित्रगुप्त पीठाधीश्वर स्वामी सच्चिदानंद महाराज यांनी यापूर्वी ९ ऑगस्ट रोजी श्रीकृष्ण जन्मभूमीवर अयोध्येच्या धर्तीवर कारसेवा करण्याची घोषणा केली होती. मात्र, स्थानिक प्रशासनासोबत झालेली चर्चा आणि सध्या सुरू असलेल्या कावड यात्रेच्या व्यवस्थेचा विचार करून, आखाडा परिषद आणि वरिष्ठ साधू-संतांच्या निर्णयानंतर कारसेवा तूर्तास स्थगित करण्याचा निर्णय घेण्यात आला. रविवारी सकाळी छटीकरा-गोवर्धन मार्गावरील झुल्हेदी चित्रगुप्त आश्रमात श्रीमद्भागवत कथेच्या समारोपानंतर विशेष हवन-पूजनाचे आयोजन करण्यात आले. (Krishna Janmabhoomi Karseva)

 

स्वामी सच्चिदानंद महाराज यांनी साधू-संतांच्या उपस्थितीत विधिवत पूजा-अर्चना करून श्रीकृष्ण जन्मभूमी मुक्तीची प्रार्थना केली. त्यांनी सांगितले की, आश्रमात हे हवन-पूजन बाल गोपाल श्रीकृष्णलाल आपल्या मूळ गर्भगृहात पूर्ण सन्मानाने विराजमान होईपर्यंत दररोज अखंडपणे सुरू राहील.(Krishna Janmabhoomi Karseva)