हिंदू आस्थेचा अपमान

 

 

 

खरे पाहिले तर, काँग्रेस आणि राहुल गांधींसाठी हिंदू आस्था ही नेहमीच सोयीच्या राजकारणाचा भाग राहिली. स्वतःला ‘जानवेधारी ब्राह्मण’ म्हणून मिरवायचे, निवडणुकीच्या तोंडावर मंदिरात जाऊन माथे टेकवायचे आणि दुसरीकडे संसदेसारख्या व्यासपीठावर देवांचे फोटो दाखवून राजकीय हेतू साध्य करायचे, हा यांचा जुनाच पायंडा. जेव्हा जेव्हा संधी मिळते, तेव्हा हिंदूंच्या मूल्यांना आणि प्रतीकांना ठरवून लक्ष्य करायचे, ही काँग्रेसची जुनी खोडच!

 

ज्या समाजवादी पक्षाच्या भूतकाळातील राजकारणाने अयोध्येत निःशस्त्र कारसेवकांवर गोळ्या झाडून शरयूचे पाणी रामभक्तांच्या रक्ताने लाल केले होते, त्याच पक्षातील नेते आज श्रीराम मंदिराच्या नावाने ‘नैतिकतेचा’ आव आणताना दिसताहेत. लोकशाहीत विरोधकांना सरकारवर टीका करण्याचा आणि भ्रष्टाचाराचे आरोप करण्याचा पूर्ण अधिकार आहे. परंतु, निषेध व्यक्त करण्यासाठी भगवान श्रीराम, अयोध्येतील मंदिर आणि संतांच्या वेशाचा अशाप्रकारे उपहासात्मक वापर करणे कुठल्या नैतिकतेत बसते? सनातन परंपरेचा, संतांच्या वेशाचा आणि साक्षात राम मंदिराचा राजकीय स्वार्थासाठी तमाशा बनवणार्‍या या ‘पोरखेळाने’ विरोधकांचा खरा चेहरा पूर्णपणे उघडा पडला आहे. संसदेच्या पायर्‍यांवर रचलेली ही नौटंकी जनता विसरणार नाही. राम मंदिरावर चिखलफेक करणार्‍या या सर्व राजकीय ढोंग्यांना देशातील रामभक्त धूळ चारल्याशिवाय राहणार नाहीत!