शरद पवारांचा पक्ष 'एनडीए'सोबत येणार ही पेरलेली बातमी - मुख्यमंत्री देवेंद्र फडणवीस; महाराष्ट्रातून एनडीएत कोणताही नवा पक्ष येणार नाही

 

मुंबई (Sharad Pawar NDA) : राष्ट्रवादी काँग्रेस (शरदचंद्र पवार) पक्षाचे ज्येष्ठ नेते जयंत पाटील आणि भाजपचे राष्ट्रीय सरचिटणीस खासदार विनोद तावडे यांच्यात मुंबईतील एका पंचतारांकित हॉटेलमध्ये शुक्रवारी गुप्त बैठक पार पडल्याची माहिती समोर आल्यानंतर शरद पवार गट सत्तेत सामील होणार का? याबाबतच्या चर्चांना उधाण आले आहे. यावर मुख्यमंत्री देवेंद्र फडणवीस यांनी भाष्य केले असून, "शरद पवारांचा पक्ष एनडीएमध्ये येणार, ही एक 'पेरलेली बातमी' आहे. या बातमीत किंवा सुरू असलेल्या चर्चांमध्ये तथ्य नाही. आगामी काळात महाराष्ट्रातून 'एनडीए'मध्ये कोणत्याही नवीन पक्षाचा समावेश केला जाणार नाही", असे त्यांनी स्पष्ट केले. (Sharad Pawar NDA)

 

मुख्यमंत्री फडणवीस मंगळवार, दि. ७ जुलै रोजी सायंकाळी दिल्ली दौऱ्यावर होते. या दौऱ्यादरम्यान त्यांनी काही महत्त्वाच्या राजकीय भेटीगाठी घेतल्याचे बोलले जात आहे. दिल्लीत पत्रकारांशी संवाद साधत असताना मुख्यमंत्र्यांना शरद पवार यांच्या पक्षाच्या आगामी राजकीय भूमिकेविषयी आणि ते एनडीएसोबत येण्याच्या शक्यतेविषयी विचारणा करण्यात आली होती. त्यावर उत्तर देताना त्यांनी या सर्व चर्चांमधील हवा काढून घेतली.

 

फडणवीस म्हणाले की, "शरद पवार यांचा पक्ष एनडीएसोबत येणार नाही. महाराष्ट्रातून एनडीएत कोणताही नवा पक्ष येणार नाही, हे मी स्पष्ट करू इच्छितो. आम्ही आमच्यासोबत आता कोणत्याही नवीन घटकाला किंवा पक्षाला जोडणार नाही. सध्या जे मित्रपक्ष सोबत आहेत, त्यांच्यासहच आगामी वाटचाल केली जाईल, असेही त्यांनी सांगितले. (Sharad Pawar NDA)