ठाकरेंची सोयीस्कर अभिव्यक्ती

 

आपल्या हिंदू संस्कृतीत ‘अन्न हे पूर्णब्रह्म’ असे म्हटले जाते. त्यामुळे अन्नप्राशन करत असताना त्यास नमस्कार करून, देवाचे आभार मानून ते सेवन करण्याचे जुनेच संस्कार. कारण, आपल्या अन्नपदार्थांच्या सेवन सवयींवरच आरोग्य अवलंबून असते. म्हणूनच म्हणतात ना, ‘जसे खाल, तसे व्हाल.’ याच बाबतीत जर ती लहान मुले असतील, तर हा विषय अजूनच नाजूक, महत्त्वाचा आणि कळीचा बनतो. कारण, वाढत्या वयात योग्य आचार, योग्य विचार जसा महत्त्वाचा, तसाच योग्य आहारदेखील महत्त्वाचा. या सर्व दृष्टीने अन्न व औषध प्रशासन विभागाचे आयुक्त तुकाराम मुंढे यांनी ‘ईट राईट स्कूल कॅम्पेन’ मनावर घेऊन जी पावले उचलली आहेत, ती स्वागतार्ह अशीच. त्यानुसार, आता शाळेच्या ५० मीटर परिसरात ‘हाय फॅट, शुगर’ प्रकारातील अन्नपदार्थांची विक्री, जाहिरात, मोफत वितरण आणि वितरणास प्रतिबंध घातलेला असून, याची अंमलबजावणी करण्याची जबाबदारी मुख्याध्यापकांची व स्थानिक शालेय समितीची असेल.

 

राज्यात १ लाख, ८ हजारांच्या आसपास शाळांना आणि दोन कोटींच्या आसपास विद्यार्थ्यांना हा निर्णय लागू असेल. विशेषतः पालकवर्ग या भूमिकेने खूपच आनंदी झालेला आहे. कारण, आपल्या मुलांना बाहेरचे खाद्यपदार्थ खाण्यापासून कसे रोखायचे, हा मोठा प्रश्न त्यांच्यासमोर होता. घरातून दिलेला डबा अनेकवेळा तसाच परत येतो किंवा खोटी कारणे सांगून अर्धाच खाल्ला जातो, असा बहुतांशी पालकांचा अनुभव. काही मुले अगदी पाणीसुद्धा कमीच पितात. कारण, त्यांचा कल हा ‘सॉफ्ट ड्रिंक’कडे जास्त. ही चिंता सर्वांनाच भेडसावत होती.

 

हल्ली सर्वत्र लहान मुले चिप्स, सॉफ्ट ड्रिंस, जंक फूड सर्रास खाताना दिसतात. घराबाहेर पडलो की, पालकांना यासाठी हट्ट करणारी, रडणारी मुले आपण सर्रास पाहतो. माध्यमांवरील जाहिराती साहजिकच त्याच भर घालतात. पण, अशा या जंक फूडच्या अतिसेवनामुळे हृदयरोग, मधुमेह, लठ्ठपणा, पचनसंस्था कमकुवत होणे, एकाग्रता कमी होणे, शैक्षणिक कामगिरीवर परिणाम अशा आरोग्याच्या तक्रारी लहान वयातच विद्यार्थ्यांना सुरू होतात. यावर आता थोडा प्रतिबंध येईल. सुरक्षित सकस व संतुलित आहार मिळावा, यासाठी आता सर्व स्तरांतून प्रयत्न होतील. यानिमित्ताने पाल्यांच्या आहाराबाबतदेखील फलदायी चर्चा सुरू होऊन, भविष्यात त्यास प्राधान्यक्रम येऊन ‘सुदृढ महाराष्ट्र’ पाहायला मिळेल, अशी आशा...