लीजच्या अटींच्या उल्लंघनाप्रकरणी महापालिकेची मोठी कारवाई

 

मुंबई : (BMC Action) वरळी येथील नॅशनल स्पोर्ट्स क्लब ऑफ इंडिया (एनएससीआय) विरोधात बृहन्मुंबई महानगरपालिकेने मोठी कारवाई करत पुढील ३० दिवस सर्व व्यावसायिक कार्यक्रमांवर तात्काळ प्रभावाने बंदी घातली आहे. लीजच्या अटींचे कथित उल्लंघन तसेच महाराष्ट्र विधानसभेच्या लोकलेखा समितीने (पीएसी) मागविलेली माहिती उपलब्ध करून न दिल्याच्या आरोपांच्या पार्श्वभूमीवर महापालिकेने हा निर्णय घेतला आहे.(BMC Action)

 

बुधवारी जारी करण्यात आलेल्या आदेशानुसार, बंदीच्या कालावधीत एनएससीआयच्या परिसरात केवळ शासकीय कार्यक्रम, महापालिकेचे कार्यक्रम आणि क्रीडाविषयक उपक्रमांनाच परवानगी असेल. इतर सर्व व्यावसायिक कार्यक्रमांवर तात्काळ प्रभावाने बंदी राहणार आहे. तसेच संबंधित अधिकाऱ्यांना नव्या कार्यक्रमांना परवानगी न देण्याचे आणि यापूर्वी दिलेल्या परवानग्याही रद्द करण्याचे निर्देश देण्यात आले आहेत.(BMC Action)

 

गेल्या वर्षी ऑगस्ट महिन्यात लोकलेखा समितीने एनएससीआय परिसराची पाहणी करून अनेक सुनावण्या घेतल्यानंतर नोंदविलेल्या निरीक्षणांच्या आधारे ही कारवाई करण्यात आली आहे. समितीने क्लबकडे व्यावसायिक उपक्रमांमधून मिळणारे उत्पन्न, सब-लायसन्स करार, सदस्यत्वासंबंधी तपशील आणि लीजच्या अटींच्या पालनासंबंधी माहिती मागविली होती. मात्र, महापालिकेच्या म्हणण्यानुसार क्लबकडून देण्यात आलेली उत्तरे समाधानकारक नव्हती.(BMC Action)

 

तपासात असेही समोर आले की, २०२० ते २०२५ या कालावधीत एनएससीआयमध्ये आयोजित करण्यात आलेल्या २०७ कार्यक्रमांपैकी १९४ कार्यक्रम (९३.७२ टक्के) हे क्रीडाविषयक नव्हते. त्यामुळे क्रीडा विकासाच्या उद्देशाने देण्यात आलेल्या जागेचा वापर मुख्यत्वे व्यावसायिक कार्यक्रमांसाठी होत असल्याचे स्पष्ट झाल्याचा दावा महापालिकेने केला आहे.(BMC Action)

महापालिकेचा आरोप आहे की, ऑक्टोबर २०२५ मध्ये कारणे दाखवा नोटीस बजावून तसेच अनेक वेळा स्मरणपत्रे देऊनही क्लबने आवश्यक माहिती सादर केली नाही. ज्या कागदपत्रांची माहिती देण्यात आली नाही, त्यामध्ये सिनेयुग वर्ल्डवाइड एलएलपीसोबतच्या सब-लायसन्स कराराचा आर्थिक तपशील, संबंधित कंपन्या व कंत्राटदारांची लेखापरीक्षित आर्थिक कागदपत्रे, २०१९ पासूनच्या बिगर क्रीडा उपक्रमांमधून मिळालेले उत्पन्न, सदस्यत्व शुल्क आणि सदस्यत्वाचे निकष यांचा समावेश आहे.(BMC Action)

 

महापालिकेने असेही नमूद केले आहे की, १९९३ मधील लीज करारातील अनेक महत्त्वाच्या अटींचे उल्लंघन करण्यात आले आहे. यामध्ये ऑलिम्पिक ओव्हलच्या वापरासाठी नियम तयार करणे, लीजनुसार नियंत्रण समितीची स्थापना करणे आणि संबंधित जागेचा वापर प्रामुख्याने क्रीडा विकासासाठी होईल याची खात्री करणे या अटींचा समावेश आहे.(BMC Action)

 

महापालिकेने क्लबला ३० दिवसांच्या आत सर्व आवश्यक कागदपत्रे आणि खुलासा सादर करण्याचे निर्देश दिले आहेत. त्यानंतर उपलब्ध करून दिलेल्या माहितीची तपासणी करून पुढील कारवाईबाबत निर्णय घेतला जाणार आहे.(BMC Action)

 

या आदेशाच्या प्रती जी-दक्षिण विभागाचे सहाय्यक आयुक्त, मुख्य अग्निशमन अधिकारी आणि संबंधित पोलीस अधिकाऱ्यांना पाठविण्यात आल्या असून, बंदीच्या कालावधीत एनएससीआय परिसरात कोणताही व्यावसायिक कार्यक्रम आयोजित होणार नाही याची दक्षता घेण्याचे निर्देश देण्यात आले आहेत.(BMC Action)