पालिकेच्या सोशल मीडिया कंत्राटात दीड कोटींची वाढ; विरोधकांचा विरोध धुडकावून प्रस्ताव मंजूर

22-Jul-2026

मुंबई : (BMC Social Media Contract) महानगरपालिकेच्या जनसंपर्क विभागामार्फत चालवल्या जाणाऱ्या सोशल मीडियाच्या कंत्राटात तब्बल १ कोटी ६४ लाख ५९ हजार रुपयांची वाढ करण्याचा प्रस्ताव स्थायी समितीत मंजूर करण्यात आला आहे. विरोधी पक्षातील सदस्यांनी या दरवाढीला विरोध दर्शवला, मात्र स्थायी समितीमधील सत्ताधारी सदस्यांच्या संख्याबळाच्या जोरावर हा प्रस्ताव मंजूर करण्यात आला. या मंजुरीमुळे आता या कंत्राटाची एकूण रक्कम ४ कोटी ४९ लाख १४ हजार रुपयांवर पोहोचली आहे. (BMC Social Media Contract)

महानगरपालिकेच्या समाज माध्यमांच्या व्यवस्थापनासाठी बाह्य संस्थेकडून (आउटसोर्सिंग) सोशल मीडिया एक्स्पर्ट, ग्राफिक डिझायनर, व्हिडिओग्राफर आणि अनुवादक यांसह एकूण १९ कर्मचाऱ्यांची नियुक्ती केली जाणार आहे. या कामासाठी पालिकेने राबवलेल्या ई-निविदा प्रक्रियेत 'मे. रनटाईम सोल्यूशन्स प्रा. लि.' या कंपनीला १ ऑगस्ट २०२४ ते ३१ जुलै २०२६ या दोन वर्षांच्या कालावधीसाठी २ कोटी ८४ लाख ८२ हजार १३१ रुपयांचे मूळ कंत्राट दिले होते. आता याच कंत्राटदाराला १ ऑगस्ट २०२६ ते ३१ जुलै २०२७ या एका वर्षाच्या अतिरिक्त कालावधीसाठी मुदतवाढ देताना थेट ४ कोटी ४९ लाख ४१ हजार २७४ रुपयांचे कंत्राट देऊ करण्यात आले आहे. (BMC Social Media Contract)

कंत्राटातील बदल

कंत्राटदार कंपनी: मे. रनटाईम सोल्यूशन्स प्रा. लि.

मूळ कंत्राट रक्कम (२ वर्षे): २ कोटी ८४ लाख ८२ हजार

अतिरिक्त वाढीव रक्कम (१ वर्ष): १ कोटी ६४ लाख ५९ हजार

एकूण सुधारित कंत्राट रक्कम: ४ कोटी ४९ लाख ४१ हजार २७४

असे असेल १९ पदांचे पदनिहाय मनुष्यबळ:

कंटेंट डिझायनर / रायटर / रिसर्चर : १४

सोशल मीडिया एक्स्पर्ट : ०१

ग्राफिक डिझायनर : ०१

व्हिडिओग्राफर : ०१

फोटोग्राफर : ०१

अनुवादक : ०१