वय हरलं, काळ हरला... जिंकला फक्त रोनाल्डो!

 

 

 

२००६ ते २०२६ असा तब्बल २० वर्षांचा प्रवास. सहा वेगवेगळ्या विश्वचषक स्पर्धांमध्ये गोल करणारा तो जगातील पहिला फुटबॉलपटू ठरला आहे. विश्वचषकाच्या इतिहासात आजवर कोणालाही हा पराक्रम करता आलेला नव्हता. विशेष म्हणजे, सहा विश्वचषक खेळण्याचा मान लिओनेल मेस्सी आणि रोनाल्डो या दोघांकडे असला, तरी सहाही स्पर्धांमध्ये गोल करण्याचा विक्रम केवळ रोनाल्डोच्या नावावर आहे. मेस्सीला पहिल्या वर्ल्डकपमध्ये गोल झळकावता आला नव्हता.

 

वयाच्या ४१व्या वर्षी त्याने विश्वचषकातील एका सामन्यात दोन गोल झळकावून आणखी एक विक्रम आपल्या नावावर केला. या वयात बहुतांश खेळाडू निवृत्त होऊन आठवणींमध्ये रमलेले असतात. पण रोनाल्डो अजूनही प्रतिस्पर्ध्यांच्या बचावफळीला हादरे देत आहे. म्हणूनच त्याची तुलना केवळ महान खेळाडूंशी होत नाही, तर मानवी क्षमतेच्या सर्वोच्च मर्यादेशी केली जाते.

 

रोनाल्डोची महानता केवळ त्याच्या गोलमध्ये नाही. ती त्याच्या रोजच्या शिस्तीत, फिटनेससाठी घेतलेल्या मेहनतीत आणि स्वतःला सतत नव्याने सिद्ध करण्याच्या वृत्तीत आहे. जगाने त्याला अनेकदा संपल्याचे घोषित केले, पण प्रत्येक वेळी त्याने उत्तर दिले, ते आपल्या खेळातून! आज रोनाल्डो हा फक्त पोर्तुगालचा किंवा फुटबॉलचा नायक राहिलेला नाही. तो प्रत्येक त्या व्यक्तीसाठी प्रेरणा आहे, जी प्रतिकूल परिस्थितीतही हार मानत नाही. म्हणूनच २०२६च्या विश्वचषकाने पुन्हा एकदा सिद्ध केले आहे, वय हरू शकते, काळ थांबू शकतो, विक्रम मोडू शकतात; पण जिद्द अमर असते! आणि त्या जिद्दीचे दुसरे नाव आहे, क्रिस्टियानो रोनाल्डो!