मुंबई : कांदिवली पश्चिम येथे १५ वर्षांपासून प्रलंबित रस्ता रुंदीकरणातील २७ बांधकामे निष्कासित करण्याची कारवाई मुंबई महापालिकेच्या ‘आर दक्षिण’ विभागाकडून मथुरादास मार्ग, स्वामी विवेकानंद मार्ग जंक्शन येथे करण्यात आली आहे. मुंबई महापालिकेतील उबाठाकडून सत्तांतर झाल्यानंतर बेकायदा बांधकामांवर बुलडोझर फिरविण्याची मोहिम तीव्र झाली आहेच.
मात्र, अनेक वर्षे विकासप्रकल्पांमध्ये अडथळा ठरणारी बांधकामेही निष्कासित करण्यात येत आहेत. पादचाऱ्यांसाठी मुंबई महापालिका पादचारी प्रथम हे अभियान राबवत आहे, त्याअंतर्गत ही कारवाई करण्यात आली आहे. पदपथ व रस्त्यांवरील अतिक्रमणे हटवून वाहतुकीसाठी आवश्यक मार्ग मोकळा करण्याच्या दृष्टीने महापालिकेकडून विविध ठिकाणी निष्कासनाची कारवाई करण्यात येत आहे.
या अनुषंगाने, कांदिवली पश्चिम येथील मथुरादास मार्ग, स्वामी विवेकानंद मार्ग जंक्शन परिसरात रस्ता रुंदीकरणाच्या कामात अडथळा ठरणारी २७ बांधकामे दि. १७ नोव्हेंबर रोजी निष्कासित करण्यात आली. ‘आर दक्षिण’ विभागाकडून ही कारवाई करण्यात आली. या ठिकाणी असलेल्या सुमारे ११० मीटर लांबीच्या रस्त्याच्या रुंदीकरणात मागील १५ वर्षांपासून ही २७ बांधकामे अडथळा ठरत होती.
आता या रुंदीकरणाच्या कामातील अडथळे दूर झाल्यामुळे स्वामी विवेकानंद मार्गावरील, विशेषतः कांदिवली रेल्वे स्थानकाच्या दिशेने होणाऱ्या वाहतुकीची कोंडी कमी होण्यास मदत अपेक्षित आहे. उपायुक्त (परिमंडळ ७) श्री. मनिष वळंजू, आर दक्षिण विभागाच्या सहायक आयुक्त श्रीमती आरती गोळेकर यांच्या मार्गदर्शनाखाली ‘आर दक्षिण’ विभागामार्फत ही निष्कासन मोहीम राबविण्यात आली.
या कारवाईसाठी ४ जेसीबी, ४० कामगार आणि १० अभियंत्यांची नियुक्ती करण्यात आली होती. तसेच, वायुप्रदूषण नियंत्रणविषयक मार्गदर्शक तत्त्वांचे पालन करण्यासाठी धूळ नियंत्रणाच्या उद्देशाने मिस्ट मशिन्सचा वापर करण्यात आला. रस्ता रुंदीकरणामुळे या परिसरातील वाहतुकीस अधिक सुलभता प्राप्त होण्यास मदत होणार आहे. तसेच वाहनचालकांचा प्रवास अधिक सुरळीत होणार आहे.